Sr Isnardo “Juni” Faro presidente actual di e Asociacion Arubano di Atleta Olimpico tawata presente na Istanbul pa delibera riba e futuro di olimpiada ,crea rednan entre e paisnan olimpico y tambe colecta informacion pa yega na fondonan international pa proyectonan social pa Aruba . Ademas a haya informacion di becanan escolar y posibilidadnan di estudio na universidadnan international cu tur atleta elite por hasi uzo di dje rond mundo.
Tur pais presente tawata tin e oportunidad pa expresa nan preocupacionan y tambe debati riba varios punto di importancia riba nivel olimpico. Aruba tambe a haya su chens pa duna su contribucion y su ideanan.
Puntonan cu a bin dilanti ta entre otro con pa mehora e bida di un atleta olimpico despues di su carera competitivo, fondonan cu ta disponible pa e atletanan haci un estudio despues di nan carera deportivo y logra un diploma universitario. Tambe a delibera tocante problemanan social entre otro obesidad y inactividad deportivo den e hoben nan. WOA a destaca e importancia di e influencia di un Olympian pa haci diferencia y duna guia den su comunidad.
Ta importante señala cu WOA ( World Olympians Association) tin como tarea pa prepara atletanan cu ta den preparacion pa un olimpiada y concientisa nan di e mision cu e atleta olimpico tin. Ademas di esaki WOA ta promove e desarrollo academico di atletanan olimpico despues di nan carrera olimpico.
Diferente anfitrion a hiba palabra. Anfitrionan di e siguiente olimpiada di verano Paris 2024, anfitrion di weganan olimpico di invierno Milan 2026 y pa culmina anfitrion nan di olimpiada di verano Los Angeles 2028. Turkia ta en buska pa ta cede di e Weganan Olimpico 2036 y no a perde e oportunidad aki pa hiba palabra.
Pronto Asociacion Arubano di Atleta olimpico lo cuminsa ehecuta proyectonan nobo.
