ORANJESTAD – Diasabra mainta minister di Turismo y Salud Publico sr. Dangui Oduber, conhuntamente cu coleganan Minister Tjon & Parlamentario Tevreden, a haci apertura di un otro Expo Salud, e biaha aki cu tema “Promocion di salud y actividad fisico na trabou” cu a tuma luga na Renaissance Convention Center.
E meta di e EXPO tawata pa brinda informacion na henter comunidad riba tur tereno di nos salud, pues conscientisa pueblo tocante nan salud, pa preveni cierto malesanan y asina biba un bida mucho mas saludabel y duradero.
Tawata tin mas cu 35 organisacion cu a participa cu informacion valioso tocante salud, actividad fisico y salud mental.
Profesionalnan a brinda informacion di diabetes, cardiovascular, di bista, movecion y mucho mas. Tawata tin oportunidad pa haci test y sa bo numbernan di cholesterol, sucu, preshon, peso y bmi. Henter e veld di salubridad publico tawatata presente como tambe diferente departamento y fundacionnan.
Prevencion ta e focus principal di Ministerio di Salud su maneho pa asina logra un comunidad mas saludabel, mas consciente di nan propio salud y mehora un y tur nan calidad di bida. Ta importante pa nota cu e expo aki ta parti di e plan nacional di prevencion di malesanan cronico no contagiabel (NCD’s). Den e plan aki e enfoke pa salud ta riba prevencion por medio di biba un bida mas activo y mas saludabel, teniendo acceso na diferente tools y tips cu por yuda nos hendenan cu esaki. Aruba ta den e poco paisnan rond mundo cu tin un plan nacional di prevencion pa e malesanan aki. E meta global ta pa reduci e cantidad di mortonan relata cu e malesanan NCD’s cu 1/3 parti pa aña 2030.
Finalmente Minister Dangui Oduber ta gradici tur persona cu a pasa bishita e expo “Promocion di salud y actividad fisico na trabou”. Un danki special na e team di Plataforma di Salud, Departamento di Salud Publico y Ministerio di Turismo y Salud Publico, y tambe tur fundacion y organisacion cu tabata presente cu nan booth na e expo, kendenan a traha extremadamente duro y a pone tur nan esfuerso pa hasi e expo aki bira un realidad.
