Home » Mamanan deteni na KIA a finalisa trayecto piloto cu exito

Mamanan deteni na KIA a finalisa trayecto piloto cu exito

by Admin
0 comment 140 views

Recientemente den colaboracion estrecho e dos organisacionnan, Fundacion Pa Nos Muchanan conhuntamente cu Stichting Tienda di Educacion a finalisa cu e trayecto piloto pa Mamanan deteni den KIA. Na 2022 e proyecto piloto aki a wordo ofreci na tatanan deteni y awor tabata turno na e mamanan. Ta trata di un total di 10 sesion ofreci cu perspectiva ariba nan regreso pronto den bida di nan yuinan y tambe enfasis na un mihor ser humano pa contribui positivamente na nos comunidad. Prome sesion pa e mamanan a start na maart y a culmina na mei ultimo, caminda cu nan a ricibi un certificado di participacion durante un momento ameno di clausura di e trayecto. 

E temanan trata ta lo siguiente:      

  • Introduccion di e trayecto y un presentacion di e fundacionnan organisador; 
  • Participacion di mama den bida di su yiu(nan); 
  • Fase di desaroyo 0- 12 aña; 
  • Fase di desaroyo 13 – 22 aña; 
  • Presupuesto; 
  • Educacion sexual; 
  • Sexualidad; 
  • Salud mental; 
  • Comunicacion positivo; 
  • Entre mayor y yiu, un comienso nobo. 

E meta principal di e proyecto ta pa reenforsa e mamanan cu informacion y herment pa mantene contacto positivo cu nan yiu(nan) durante y despues di nan detencion. Di e forma aki ta fortalese e laso entre mama y yiu. Na mes momento ta prepara e mamanan cu herment pa ora bolbe cas bek. Nan ta siña reconoce y prepara pa posibel cambio den comportacion di nan yiu (nan), desaroyo di mucha, e importancia pa duna e yiu(nan) espacio pa custumbra di nobo y con pa fortalese e conexion entre mama y yiu. Alaves ta enfoka ‘riba e mama como persona y e rol importante di mayor y educador cu e tin. Diferente organisacionnan profesional a comparti nan expertisio cu e participantenan. E detenidonan a sera conoci cu e organisacion, a ricibi informacion tocante e tema y a haya sa unda por acudi na momento cu tin necesidad di esaki. Asina e trayecto a conta cu colaboracion di sra. Thaisa Thielman di Departamento di Asunto Social den su experticio con pa traha un presupuesto sra. Eveline Yarzagaray & Ghislaine Koeiman di Famia Planea den locual ta trata sexualidad, sr. Jose Mendoza di Stichting Hunto a trata e topico di salud mental y sra. Drs. Swinda Dumfries, sra. Maritza Ordonez & Sr. Aldrick Dirksz di Directie Volksgezondheid a elabora tocante e topico di comunicacion positivo. Sra. Janelle Artsen y sra. Felishah Ponson di Fundacion Pa Nos Muchanan y Elisa Zievinger di Stichting Tienda di Educacion a elabora ‘riba diferente temanan. Di parti Fundacion Pa Nos Muchanan sra. Natasha Gilkes y di Stichting Tienda di Educacion sr. Rhomyko Winklaar a coordina e trayecto piloto aki y a trata e otro temanan den cuestion. 

Intencion ta pa haci e trayecto aki uno structural pa e detenidonan, ambos femenino y masculino den KIA cu ta un mayor. Lo sigui tambe cu sesionnan den 2024 y asina prepara detenidonan pa nan regreso den famia por ta uno cu balor agrega na bienestar di e muchanan. Di e forma aki ta duna participantenan un perspectiva y prepara nan pa forma parti di nos comunidad y ta un mihor ciudadano en general. 

Fundacion Pa Nos Muchanan conhuntamente cu Stichting Tienda di Educacion kier gradici sra. Shereida Simmons, trahador social di KIA y sr. Luberth (Gino) Winklaar, director di KIA, como tambe henter e personal di KIA pa e oportunidad y e colaboracion brinda durante e trayecto piloto tras di lomba. 

Fundacion Pa Nos Muchanan ta situa na Cumana 2. Orario di servicio ta di 8am-4.30pm. Por tuma contacto cu Fundacion Pa Nos Muchanan di dialuna pa diabierna via whatsapp: 699-8900, Facebook messenger of e-mail [email protected]. Of telefon fiho: 583-4247.

Stichting Tienda di Educacion ta situa den edificio di Centro Pa Hoben y Famia, Sabana Blanco 68-C. Orario di servicio ta di 8 am – 6 pm. Por contact Tienda di Educacion di dialuna pa diabierna via 161, Facebook Messenger of e-mail [email protected]. Pa keda informa like y follow e Facebook & Instagram Page. Bishita tambe nan Website y YouTube Channel pa mas informacion. 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio