Prome Minister Minister Evelyn Wever-Croes dialuna mainta, a bishita Prinses Amalia Basisschool na unda cu tawata tin un presentacion di Leerorkest. Leerorkest ta un proyecto cu a cuminsa algun aña pasa pa purba trece e conocemento di musica den alumnonan di scolnan, tanto den conocemento di canto pero tambe den instrumentonan di musica.
Prome Minister a disfruta di un bunita presentacion duna na mayornan di nos muchanan di Prinses Amalia Basisschool. Prome Minsiter ta felicita Leerokest cu e exito di e proyecto aki y pa e presentacionnan tumando luga na diferente scol na Aruba.
“Por a nota cu mayornan ta hopi impresiona y contento pa mira con nan yiunan ta desaroyando riba e area di musica y instrumentonan cu usualmente nos no ta expone nos muchanan na dje. Pabien na Leerorkest y na juffrouw Roelin Hofman y tur e ekipo di Prinses Amalia Basisschool. Esaki ta algo cu ta tuma hopi tempo y hopi pasenshi”, Prome Minister a expresa.
Prome Minister a remarca cu compara cu aña pasa, el a nota un diferencia y progreso hopi grandi siendo cu aña pasa e muchanan a duna un bunita presentacion, e aña aki a bay mas riba un nivel di profesionalismo. “Pabien cu e bunita proyecto. Un proyecto cu tin hopi reto, pero ta trahando riba solucionnan pa asina e proyecto continua”, Prome Minsiter a enfatisa.
