Den cuadro di e reunionnan strategico andando na Hulanda, delegacion di Pais Aruba, lidera door di Minister Plenipotenciario señor Ady Thijsen, a reuni cu grupo di conseho di Alder di Rotterdam, señor Ahmed Aboutaleb. E grupo aki ta consisti di individuo renombra y cu experiencia amplio y riba diferente tema, entre otro temanan di inclusion di gruponan vulernabel den sociedad y stimulacion di hoben y con pa contraaresta pobresa. E presidente di e grupo di conseho ta señor Ernest van der Kwast cu ta un autor y moderador conoci na Hulanda. Tambe tabata presente representante di Vereniging voor Nederlandse Gemeente (VNG), specialisa den tratado di Nacionnan Uni cu ta regarda personanan cu deshabiildad, tambe un specialista riba tereno intercultural, secretario di grupo di conseho y consehero di asunto internacional di Alder di Rotterdam. E reunion tabata uno sumamente informativo unda cu e grupo a splica ampliamente nan funcion y e balor agrega pa locual ta e maneho di e Alder. Asina a splica cu nan meta ta pa for di un punto di salida alternativo evalua con e maneho di Alder ta wordo absorba den comunidad y pa cu esaki su efectividad. Asina por evalua si maneho y practica ta cuadra cu otro. E grupo di conseho aki ta uno crucial pa motibo cu riba manera constructivo ta acerca e varios retonan cu e ciudad di Rotterdam ta atende cu ne manteniendo e importancia di e ser humano den esaki central. Por pensa riba retonan manera e crecemento economico cu e ciudad ta experiencia pero na unda cu na mesun momento tin pobresa. A indica cu e fenomeno aki no tin di haber solamente cu e tema di recurso (financiero) pero tambe tin di haber cu hopi individuo por perde den e sistema y cuantioso regla di gobierno di Hulanda. Mirando cu Aruba na su turno ta experienciando un recuperacion economico despues di temporada di COVID y cu na mesun momento tambe tin reto pa atende cu ne, e instrumento den forma di e plataforma aki ta uno cu lo wordo evalua. Por indica cu e grupo di conseho tabata hopi interesa den nos pais y cu tur esnan presente tabata satisfecho cu e reunion. E delegacion di Aruba ta bou di encargo di Minister-President di Aruba señora Evelyn Wever-Croes y lidera door di Minister Plenipotenciario di Aruba, señor Ady Thijsen. Hunto cu representante di Tijdelijke Werkorganisatie Aruba, señora Indra Zaandam, ta participando na diferente reunion strategico den cuadro di Aruba su trayecto di recuperacion. Prome Minister ta gradici e delegacion di Aruba pa e trabounan cu nan ta bin ta haciendo den cuadro di e recuperacion di Aruba despues di e crisis di e pandemia y ta desea nan exito den e reunionnan strategico cu ta tumando luga y forsa pa continua cu e trabounan pa realisa e metanan cu exito.