Home » Enfocando riba recuperacion, colaboracion y oportunidadnan nobo: Representantenan di Aruba presente na conferencia ‘Seatrade Cruise Global 2023’

Enfocando riba recuperacion, colaboracion y oportunidadnan nobo: Representantenan di Aruba presente na conferencia ‘Seatrade Cruise Global 2023’

by Admin
0 comment 126 views

E siman aki un biaha mas ta tumando luga e conferencia anual Seatrade Cruise Global, un conferencia enfoca riba ‘B2B’ (Business to Business), unda ta trece cumpradonan y proveedonan di servicio y/of producto hunto. 

 

Manera ta custumber Aruba Ports Authority y Aruba Tourism Authority ta presente na e conferencia aki pa representa Aruba como destinacion, fortaleciendo lasonan y tambe enfocando riba oportunidadnan nobo. Tin varios compania di actividad y shipping na Aruba cu tambe ta presente pa asina reuni cu nan socionan.

 

E aña aki e conferencia a cuminsa cu un iniciativa nobo unda cu prome cu e conferencia mes a cuminsa, socionan den industria por a reuni cu ehecutivonan di crucero. Esaki ta algo cu ya ta comun den e di dos mita di aña durante e conferencia di FCCA, pero a nota cu tin un necesidad pa e oportunidad di conecta aki mas trempan den aña. 

 

E reunionnan a tuma luga den un formato di “speed dating” y a duna oportunidad pa reafirma relacionnan existente y traha riba relacionnan nobo. A.T.A. y APA a reuni cu liñanan crucero cu ya ta familiar cu nos destino y cu otronan cu a expresa interes den Aruba, principalmente door di e poder di Aruba su “marca”.

 

Den e mundo crucero e islanan ABC, ta traha hopi di cerca cu otro mirando cu Aruba, Boneiro y Curacao ta den e parti sur di Caribe unda no tin e mesun cantidad di itinerario crucero ta yega, compara cu e islanan parti Norte di Caribe. Pa ta mas fuerte comoe ekipo e 3 islanan ta uni forsa durante di Seatrade y tin un ‘booth’ hunto unda ta traha conhuntamente pa crea oportunidadnan cu por beneficia tur 3 isla.

 

E delegacion di Aruba a reuni cu diferente socio incluyendo diferente liña crucero manera: American Queen Voyages, Sea Dream Yacht Club, Holland America Line, Oceania/NCL/Regent, Ritz Carlton, Fred Olson Cruise Lines, Virgin Cruises, Princess Cruises.  

 

Un dato interesante cu a sali for di reunionnan ta cu liñanan di crucero mas chikito a expresa interes den Aruba y tawata buscando informacion entre otro di actividadnan na Aruba. Den mayoria caso esaki ta pa itinerarionan mas largo cu barconan mas nobo. Tin interes tambe pa considera Aruba pa “turn-arounds” mirando e disponibilidad cu tin di vuelonan. 

 

Pa loke ta trata e industria crucero tin oportunidad pa sigui stimula duracion mas largo di bishitanan den puerto, unda por logra cu e barco ta keda Aruba pa “overnight”, stimula introduccion di mas bishita durante lunanan di verano y introduccion di mas barco boutique/ di luho / upscale. Esaki hunto cu e continuacion di upgrade di e producto y oferta di parti di Aruba. Atencion ta hopi dirigi tambe riba kico Aruba por carga como destino, teniendo na cuenta bienestar di nos comunidad y un experiencia optimal pa nos bishitantenan crucero y di estadia mas largo (“stay-over”). 

“Nos tin hopi oportunidad pa fortalece nos industria di crucero, a traves di nos asociacionnan cu partners cu interes internacional manera FCCA (organisacion di crucero) y liñanan di crucero individual, pero loke ta mas importante, cu stakeholders local manera Ministerio di Turismo, A.P.A., operadornan turistico, taxi, Cuerpo Policial Aruba, Departamento di Tranporte Publico (DTP) y tur e demas empresanan cu ta parti di e industria aki”, di acuerdo cu Ronella Croes.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio