Home » AAA a publica su Rapport Anual 2023: Enfatisando su vision, strategia y impacto den comunidad

AAA a publica su Rapport Anual 2023: Enfatisando su vision, strategia y impacto den comunidad

by Admin
0 comment 82 views

 

 

ORANJESTAD- Aruba Airport Authority N.V. (AAA) tin e placer di anuncia e publicacion di su Rapport Anual pa aña 2023. E rapport aki, no unicamente ta destaca e vision, e strategia y e metanan di AAA, sino cu ademas e ta demostra e rol fundamental cu aeropuerto ta eherce den comunidad di Aruba. 

 

Na AAA, nos vision ta pa converti den un di e aeropuertonan mas sostenibel, sigur y a prueba di futuro den e region di Latino America y Caribe, brindando un luga di trabou confiabel, cu instalacionnan moderno y un excelente servicio n’e cliente p’asina refleha e hospitalidad di Aruba y contribui na un futuro prospero pa Aruba.  Nos strategia ta basa riba cuater pilar clave: desaroyo den e organisacion y personal, calidad di servicio, innovacion y oportunidad nobo, sostenibilidad y responsabilidad social. E pilarnan aki t’e guia di e metanan di nos compania, dunando nos un empuhe pa mehoracion y excelencia den tur e aspectonan di nos operacion.

 

E Rapport Anual 2023 ta conta cu un formato nobo cu ta coordina cu nos prioridadnan strategico. E ta proporciona un descripcion general di loke nos a logra durante aña 2023 y ta describi nos plannan p’e siguiente añanan. Cu e formato nobo aki, ta nos intencion pa comunica di un manera transparente e progreso di nos metanan strategico y demostra nos compromiso riba e dunamento di cuenta y transparencia. 

 

AAA ta kere firmemente den comparti su Rapport Anual di un manera transparente ta crucial pa AAA, su stakeholder y comunidad di Aruba. Door di comunica abiertamente riba e desaroyo di e unico aeropuerto di Aruba, e meta ta pa subraya e importancia di un infrastructura di aviacion solido. Cu e transparencia aki nos no kier djis fomenta confiasa y comprension entre nos stakeholders, sino cu nos ta desea pa inspira e otronan pa priorisa pa ta habri y duna cuenta di nan operacionnan.

 

Algun di e aspectonan clave cu a destaca den e Rapport Anual 2023 ta inclui cu a brinda servicio na mas di 25 aerolinea cu mas di 45 ruta cu ta inclui mas di 5 destinacion nobo y 2 aerolinea nobo cu ta transporta mas di 2.9 miyon pasahero, loke ta representa un crecemento di 14% compara cu aña 2022. Aeropuerto di Aruba a disfruta di un mayor satisfaccion di e pasaheronan y puntuacion di experiencia cu ta hib’e na e nivel mas halto di tur tempo, di 4.50 y 4.32 riba un escala di 5 punto, siendo number 5 excelente. Nos mes a cuminsa maneha e operacion di Aviacion General (FBO) y a hacie un exito durante su prome aña na 2023. Aeropuerto di Aruba a ricibi certificacion un bes mas bou di e programa Green Globe Certification y ademas a logra e nivel 3 di e programa ACI Carbon Accreditation na aña 2023. 

 

Joost Meijs, CEO di AAA, a indica cu: “Cu masha orguyo nos por recorda un otro aña exitoso pa AAA y Aeropuerto di Aruba. Nos no lo por a alcansa nos metanan y e aspectonan cu mas a destaca na 2023 sin e sosten di henter e team di AAA, e stakeholders denter di e comunidad di aeropuerto como tambe stakeholders externo dentro di e industria di aviacion y turismo di Aruba. Nos gradicimento di mas sincero na cada miembro di e team di AAA y tur stakeholder. Nos ta comprometi pa sigui traha p’asina alcansa nos meta di converti den e aeropuerto lider den Caribe”. 

 

Ademas di e Rapport Anual, AAA a publica su Corporate Social Responsibility (CSR) Report pa aña 2023. E rapport aki ta brinda informacion detaya riba e iniciativanan di sostenibilidad, esfuerso di participacion den comunidad y practicanan etico comercial. 

 

Nos ta invita tur esnan intersa pa explora e Rapport Anual y e Corporate Social Responsibility (CSR) Report 2023 di AAA pa tin un bista riba e prioridadnan strategico di AAA, e logronan, e plannan y e compromiso cu e responsabilidad social y cu medio ambiente. E informacionnan ta disponibel riba e siguiente pagina di nos website:

https://www.airportaruba.com/annual-reports

 

Tocante AUA Airport

AUA Airport ta un di e aeropuertonan mas ocupa den region Caribe, cu mas di 25 diferente aerolinea operando na Aruba contribuyendo na casi 3 miyon pasahero pa aña y brindando servicio aereo na 31 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 79% ta di Merca y Canada, 14% ta di Latino America, 4% ta di Europa y 4% ta di Caribe Hulandes. AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu instalacionnan moderno y ademas cu un excelente servicio n’e cliente p’asina por refleha e hospitalidad di Aruba, contribuyendo na un futuro prospero pa Aruba. 

 

Haya sa mas di loke ta pasando na AUA Airport door di bishita www.airportaruba.com y conecta cu AUA Airport riba Twitter.com/Aruba_Airport, Facebook.com/ArubaAirport, Instagram.com/arubaairport

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio