ORANJESTAD: Diabierna ultimo, e gran evento di gala Premio Excelencia den Deporte 2023 a tuma luga den e prestigioso ballroom di Renaissance Convention Center. Durante e gran evento deportivo aki, Sr. Hugo Themen a ricibi reconocemento Baluarte den Deporte for di man di Premier Evelyn Wever-Croes. Sr. Hugo Themen ta referee di hisamento di peso. Sr. Themen a inicia su trayectoria deportivo na aña 1974 como atleta y despues a bira entrenado di hisamento di peso. Den su trayectoria, Sr. Themen a bira campeon di Aruba varios biaha. Despues di aña 1978, Sr. Themen a bay biba na Hulanda y a sigui practica e deporte di hisamento di peso eynan. Sr. Themen tabata forma parti di e Seleccion di Hulanda y 12 biaha a titula campeon di Hulanda. Na aña 1992, Sr. Themen a regresa Aruba y guia varios deporte como entrenado di hisamento di peso pa Weganan Olimpico. Awendia, Sr, Themen ta competi ainda y participa den diferente competencia di master, cual a titula 12 biaha Campeon Panamericano y alrededor di 5 biaha campeon Centro Americano y del Caribe. Banda di esaki, Sr. Themen ta fungi como referee internacional. Sr. Themen ta encurasha e hobennan cu ta desea di practica e deporte aki pa pasa Compleho Deportivo Frans Figaroa pa inscribi. Finalmente, Minister Endy Croes ta gradici Sr. Hugo Themen pa pone Aruba su nomber briya varios biaha den exterior y ta felicit’e cu su reconocemento di Baluarte Deportivo bon mereci. Aruba ta orguyoso di bo.