MINISTER ENDY CROES A REUNI CU SOCIAAL ECONOMISCHE RAAD (SER)

ORANJESTAD: Recientemente, Minister Endy Croes a reuni cu Sociaal Economische Raad (SER). Durante e encuentro a trata diferente topico, observacion y preocupacion tocante analfabetismo funcional (laaggeletterdheid) na Aruba. Departamento di Enseñansa tambe a forma parti di e reunion aki y a trece dilanti un programa cu a desaroya na aña 2016 relaciona cu analfabetismo na Aruba. Banda di esaki, SER a bin cu algun conseho con pa trata analfabetismo funcional, pa asina duna e oportunidad na esnan cu no por lesa of skirbi corectamente.
Alfabetismo funcional ta esencial pa por funciona efectivamente den sociedad. Nos ta referi na Analfabetismo funcional ta ora cu un persona por lesa y skirbi, pero e nivel di e habilidadnan aki ta minimo cu nan no por funciona corectamente den sociedad. E motibonan di analfabetismo funcional ta depende di cada individuo. No tin un motibo specifico. E causa di esaki por ta: situacion na cas, ambiente social y/of problema di siñamento y comportacion. Pues, Minister di Enseñansa ta trahando hunto cu SER y Departamento di Enseñansa pa soluciona e problema aki na Aruba.