Unda a trata diferente proyecto nobo y interesante pa Aruba.
ORANJESTAD: Dialuna mainta durante conferencia di prensa Gobierno di Aruba, Minister Endy Croes a elabora riba su biahe pa Curaçao pa coordina diferente proyecto. Na yegada na Curaçao Minister Endy Croes tabatin entrevista na canal television Nos Pais Television hunto cu sra. Mavis Albertina y a dialoga ampliamente tocante deporte y enseñansa. Despues cu a termina e entrevista na Nos Pais Television, e Mandatario di Enseñansa y Deporte a haci un bishita oficial na Obispo Luis Antonio Secco y Pastor Cortez di Curaçao. Durante e bishita nan a dialoga tocante e futuro di enseñansa. Banda di esaki, a reuni cu Minister di Enseñansa, Ciencia, Cultura y Deporte, sr. Sithree van Heydoorn. Durante e reunion aki a termina di coordina e Weganan Interinsulair 2023 cu ta panifica pa otro aña den e luna di maart y april na e islanan di Aruba, Boneiro y Curaçao. Tambe, a bin dilanti durante e reunion aki cu Minister di Deporte di Curaçao y Gobernador di San Andres lo desea di traha hunto cu Aruba den un proyecto deportivo nobo. E proyecto aki ta trata di un serie di baseball entre e islanan Curaçao, San Andres y Aruba y di e forma aki tambe promove “hermandad”. Fuera di esaki, Minister Endy Croes a reuni cu Minister di Desaroyo Econimico, Ruisandro Cijntje. Durante e reunion a dialoga riba topiconan manera: ecomomia y deporte. Ademas, a dialoga riba “hermandad” y con por sigui stimula esaki. Na Centro Comercial Sambil a tuma luga conferencia di prensa hunto cu sra. Mavis Albertina di Nos Pais Television, Minister van Heydoorn, Minister Cijntje y Federacion di Baseball di Curaçao unda a lansa e proyecto Serie del Caribe. Un proyecto deportivo hopi interesante, unda cu Seleccion di Curaçao lo participa den Serie del Caribe 2023 den e luna di februari na Caracas, Venezuela. Tambe, a señala cu entre 4 y 6 profesional di Aruba ta forma parti di e Seleccion di Curaçao y lo hunga bou di e bandera di Curaçao. E canal di television Nos Pais Television di Curaçao a adkiri oficialmente e derecho exclusivo pa transmiti wega durante e torneo di baseball aki. A traves di TeleAruba canal 23, pueblo di Aruba lo por wak tur e 32 weganan di Serie del Caribe. Nos Pais Television tin un total di 7 comentarista pa trasmiti e weganan aki, cual comentarista sr. Edson Kelly di Aruba tambe ta forma parti pa reforsa e transmission di e weganan. Por ultimo Minister di Cultura, van Heydoorn a haci un recorido y presenta na Minister Endy Croes e concepto con Curaçao ta maneha Fundacion Carnaval Curaçao unda cu tur loke ta regarda carnaval ta bou di un solo dak.