Oranjestad, Aruba – 28 November 2022, cu grato placer y honor Aruba North Little League (ANLL) ta preparando pa e prome USA Baseball Coaching Clinic tumando lugar dianan 2-3-4 di december proximo. Tin mas cu 60 coach di Aruba cu a registra pa forma parti di e evento aki y como organisador, e team completo di ANLL ta finalisando tur detaye pa e bira un evento exitoso.
Recientemente a tuma lugar un zoom talk cu Andrew Bartman, coaching development director na USA Baseball. Coach Bartman a introduci y elabora ariba di tur cuater (4) coach di e USA Baseball coaching staff cu lo ta presente pa duna e training y comparti nan experiencia, y conocimento riba e deporte di baseball. Mester remarca cu ta prome biaha den historia cu USA Baseball ta draai un clinic internationalmente. E programa aki ta sumamente exitoso na Merca y como un isla chikito manera Aruba nos ta afortuna pa por conta cu e caliber di e presentador (coachnan) aki.
Sr. Bartman a comparti cu e lo kier logra cu e evento aki pa comparti no solamente expertisio di nan banda, pero tambe di e coachnan local. E ta agrega cu baseball ta un “universal language” y ta trese hende hunto di tur parti di mundo. Por sigui e interview complete via e link aki: https://fb.watch/h30i4Jxby7/
E programa lo cuminsa inoficialmente ariba diabierna, 2 di december cu un “Meet and Greet” di 6-8pm na Local Store. Ariba diasabra, 3 di december, lo tin e Coaching Session 1 (theoretico) di 12 – 5pm na Universidad di Aruba (Classroom A) y ariba diadomingo, 4 di december, lo tin e Coaching Session 2 (practico) di 9am – 3pm na stadion Nadi Croes/Crismo Angela (NCCA). Tin un maximo cantidad di 80 coach cu por inscribi pa e session, di cual nos ta na 75% di capacidad caba. Manager, coachnan y dirigentenan ta keda cordialmente invita pa registra online na bit.ly/arubacoachingclinic
Segun presidente di ANLL, Sr. Elston Figaroa: “E motibo principal di organisa e evento aki ta pa nos coachnan sigui prepara nan mes y a cambio prepara nos muchanan mihor. Por cierto nan mes a pidi pa liga organisa tipo di clinica asina, nos a habri inscripcion pa tur organisacion na Aruba. Nos ta un isla chikito cu tin hopi amor pa e deporte di baseball, si nos por combina e pasion y dedicacion pa e deporte cu e boluntad pa desaroya nos mes como coach, e hungadornan y e isla lo sigui prospera.”
E participantenan por prepara pa tres (3) dia di interacion cu coachnan Andrew Bartman, RJ Farrell, Bryan Madsen y Andre Butler, cada un cu nan nivel di preparacion den e deporte di baseball como coach di High School of College. Conoce un tiki di e coachnan:
Andrew Bartman
A uni su mes na e staff di USA Baseball den maart 2019, como director di “Coaching Development”, Bartman ta encarga cu desaroya e recursonan pa coaches y ta traha cu e team di desaroyo pa evalua y crese e educacion cu e organisacion ta ofrese. Tambe e ta maneha e programa di Coaches Clinics, pa engrandece e programa gratuito “Community Clinics” pa inclui eventonan virtual y den persona cual miles di coaches ta atende. Bartman a lansa e programa regional di clinics den december 2019, unda USA Baseball ta partner cu clubnan di MLB pa dos dia di eventonan pa coaches incluyendo diferente presentador di alto nivel na parknan di MLB. Prome cu Bartman a cuminsa na USA Baseball, e tawata e liaison di Youth Division na American Baseball Coaches Association (ABCA) pa dos aña.
RJ Farrell
Den 2023 lo ta Coach Farrell su 16 aña como coach, y su di 4 aña na Orange Lutheran High School. Su carera di coach a consisti di scolnan avansa secundario (High School), universitario (college) y ariba nivel internacional. Actualmente, e ta fungi como e Associate Head Baseball Coach na Olu High School. Esaki lo ta Coach Farrell su di dos temporada cu e Lancers, despues di tawata e assistant coach pa e team campeon di Trinity League den 2012. Prome cu ela regresa bek na Olu, Coach Farrell tawata e Head Baseball Coach na Rancho Cucamonga High School di 2013-2019. Ademas di su trabou den programanan atletico den educacion, Coach Farrell ta trahando cu USA Baseball desde 2012. Regionalment, e ta hopi envolvi den e NTIS (National Team Identification Series) pa selecta tur hungador den tur categoria. Tres biaha ela fungi como Assistant Coach pa e 12U USA Baseball National Team, y a forma parti di ricibi dos medaya di oro. Den 2022, Coach Farrell tawata atrobe e head coach pa e 12U National Team, hibando e team na bira campeon na Taiwan.
Bryan Madsen
E aña aki Coach Madsen lo cumpli su di 9 aña ta coach. Lo ta su di dos aña como Head Coach y Director di Baseball operations na St Josephs High School na Santa Maria California, despues di a fungi 7 aña como an assistant na Arroyo Grande High School. Coach Madsen a cuminsa su carera como coach siñando di Nick James y e Cannons Baseball Organization, como un evaluador y instructor di defense/baseruning na Florida, prome cu ela regresa como coach na su Alma Mater, Arroyo Grande High School bou di Brad Lachemann. Den 2016, USA Baseball a invita coach Madsen pa yuda pa un dia cu e 12U National Team Open, un evento pa yuda busca y selecta e 12U National Team, un team cu a gana Oro. Ela sigui regresa pa yuda y a ricibi invitacion pa ta riba varios task force, y pa evalua y coach diferente gruponan den diferente evento y team. Incluso pa ta parti di e staff pa selecta e 12U team national den e ultimo dos añanan, cual team di 2022 a gana atrobe un otro medaya di oro.
André Butler
Andre Butler tin 11 aña di experiencia como coach riba nivel universitario (college) y ta e doño y operador di Graveyard Mentality. Graveyard Mentality ta un programa di training specificamente crea pa outfielders, mirando e falta di atencion cu ta duna na e posicionan aki na e nivel di scol avansa y universitario. Andre tin experiencia cu siña e atleta strategianan ofensivo na un manera individualisa. Coach Butler a fungi como hitting coach na e siguiente universidadnan: Penn State, DeSales University, University of Pennsylvania y Swarthmore College. Den e ultimo dos añanan Andre a eherce e rol di identifica y desaroya hungadornan pa e USA Baseball National programs.
ANLL ta gradici tur instancia cu di un manera of otro a yuda realisa e evento aki te ainda, y ta sigui buska sosten pa asina organisa un evento cu lo ta exitoso pa tur participante, entre otro: Driftwood, Taste My Aruba, The Old Man and the Sea, Texas de Brazil, The Old Fisherman, Eagle Resort Aruba, Fofoti Tours, Local Store, Aruba Little League, SubsidieCommissie, ABBA y Minister Endy Croes.