Home Politics Minister Ursell Arends: Interes grandi pa Congreso Consultativo Corporate Governance, un ehempel...

Minister Ursell Arends: Interes grandi pa Congreso Consultativo Corporate Governance, un ehempel di democracia mas participativo

SHARE

Diahuebs mainta 3 di november, a inicia e Congreso Consultativo di Corporate Governance unda esnan cu ta labora den e tereno di entidad publico y semi-publico por a participa y contribui den e proceso legislativo riba e concept-Landsverordening y Code Corporate Governance.

E meta di e congreso ta pa haci un inventario di posibel circunstancianan cu lo por impidi cumplimento di e leynan, prome cu sigui cu e proceso legislativo y asina garantisa cu e leynan lo funciona debidamente den practica. Gabinete Wever-Croes II tin e ambicion pa fortalece practicanan di Good Corporate Governance den e entidadnan publico y semi-publico mas pronto posibel, y a base di miho standardnan internacional (“best practices”).

Minister di Integridad, Sr. Ursell Arends ta contento di mira e interes cu tin den comunidad pa hunto haci pasonan pa realisa “excellent corporate governance”. Tur pregunta, comentario y sugerencia ta aporta na un Ordenansa Nacional mas aplicabel den practica. E congreso ta sirbi como ehempel di un democracia mas participacivo pa bienestar general, un punto clave den vision di Minister Arends.

Palabra di gradicimento ta bai na miembronan di Commissie Corporate Governance pa cumpli cu tareanan cu e meta pa hisa e nivel di integridad den e aparato publico y semi-publico. Na consehero huridico, mr. Carlos Guiamo cu a sa di carga e proyecto aki di parti di ministerio TINO, na key partners, Themis Institute for Governance & Leadership y Universidad di Aruba. Mas cu claro ta desea exito na tur esnan cu a participa.