Home Local Destaho publico di cuido medico di Colombia a cuminsa

Destaho publico di cuido medico di Colombia a cuminsa

SHARE

Recientemente Organo Ehecutivo AZV (OE AZV) a inicia e proceso di destaho publico pa e cuido medico den exterior, specificamente Colombia.
Aki ta unda OE AZV a tene e prome reunionnan informativo y orientativo cu’n total di cinco hospital di Colombia cu a mustra interes y ta califica pa participa na e proceso aki.

Ban reforma pa garantisa
Manera ta conoci, no solamente OE AZV mester a introduci cambio dentro di e lista di remedi, pero tambe mester cumpli na e peticion pa traha na un forma mas eficiente. Un di e areanan cu OE AZV kier mehora y organisa mas miho ainda compara cu e añanan anterior ta e cuido medico den exterior. Ya caba den pasado OE AZV a aplica destaho publico pa varios otro area di cuido medico, por ehempel pa materialnan di cuido y tambe pa e cuido medico den exterior. A re-evalua e sistema di cuido medico unda na 2012 a stop di traha cu broker y a bay over na contracta directamente cu e hospitalnan na Colombia. E trayecto di re-evaluacion a bolbe tuma luga na 2019, sin embargo debi na e pandemia di covid-19 mester a para tur cos. Awor na 2022 ta inicia e trayecto bek.

Meta di e destaho publico
OE AZV ta sigui cumpli cu su meta principal esta pa obtene calidad, eficiencia y accesibilidad di cuido medico na e miho prijs posibel pa cada asegurado. Un di e metodonan pa sigura cu cuido medico ta di calidad, accesibel y financieramente manehabel ta pa medio di un compra di servicio y cuido medico strategico.
Rekisitonan pa participa
E trayecto mes ta uno cu lo tuma alrededor di 8 luna den total y ta distingui diferente etapa. Cada hospital cu ta desea di participa mester cumpli na diferente rekisito stipula dentro di e “terms of reference”, cual ta un documento cu ta describi tur rekisito na cual e hospitalnan interesa pa participa mester cumpli pa finalmente yega na duna OE AZV un oferta. OE AZV recientemente tabata di bishita na Colombia pa asina oficialmente inicia e proceso. Varios reunion orientativo a tuma luga unda OE AZV a duna splicacion di e destaho publico y tambe a scucha e preguntanan di e diferente hospitalnan. Riba e imagen por mira ora e grupo di trabou di OE AZV a reuni cu profesionalnan di Fundacion Santa Fé de Bogota.