Den cuadro di prome aña di Gobernacion, informacion y transparencia ta indispensabel pa sigura cu ta mantene nos pueblo informa.
For di 21 di September 2021 Minister Glenbert Croes a wordo encarga cu e cartera di Labor, Energia & Integracion. Aunke poco exponi, hopi a wordo haci na nivel di Ministerio di Labor, Energia & Integracion.
Labor
Den cuadro di maneho laboral, diferente esfuerso a wordo haci cu ta conduciendo cu desempleo ta bahando. Desempleo bou di nos hobennan tambe ta bahando. Esaki ta un señal cu ta riba bon caminda. Un otro noticia importante ta, cu ta preparando pa e aumento di salario minimo cu ta tuma luga na 2023.
Minister Croes a sigui splica cu e esfuersonan riba tereno laboral ta pa percura pa pone nos hendenan bek na trabou. P’esey e mandatario ta sumamente contento cu e inversionnan cu ta haciendo den Enseñansa pa Empleo. Pronto lo anuncia e Enseñansa pa Empleo nobo y renoba, unda nos trahadonan y hobennan lo pasa nan curso pa asina nan por cpacita nan mes pa ta mihor trahado y pa ta mas efectivo riba e mercado laboral.
Energia
Riba tereno di energia Minister Croes a anuncia cu actualmente ta den pleno ehecucion e proyecto di Eagle LNG. Pronto lo bisa ayo na “Heavy Fuel Oil” (HFO) cual ta un di e factornan cu ta conduci na aumento di prijs di awa y coriente. Consecuentemente lo logra baha prijs di awa y coriente y percura pa proteccion di medio ambiente, door di minimalisa e emisionnan di CO2. E cambio aki pa gas, lo tuma luga na WEB aki 30 luna mas tarda.
Ademas, trabounan ta andando pa percura pa reactiva henter e zona di refineria cu industrianan di energia cu tecnologianan moderno, operando a base di gas, teniendo cuenta cu medio ambiente. Banda di diferente cupo di trabou cu esaki lo crea, e proyecto aki lo stimula desaroyo economico di nos pais y aumenta entrada di caha di gobierno.
Pues e proyectonan riba zona energetico, hunto cu e desaroyo turistico cu lo tuma luga na San Nicolas, lo percura cu San Nicolas lo ta e centro di e siguiente boom economico cu lo trece bonansa economico pa henter Aruba.
Integracion
Riba tereno di integracion, Minister Croes a expresa cu e ta comprometi na percura pa e procesonan na DIMAS y DPL di integracion y di maneho di admision di stranheronan, tuma luga na un forma mas eficiente, mas humano, mas corecto y mas transparente.
Tin pleno confiansa cu DPL y DIMAS hunto, trahando den bon cooperacion cu otro, lo logra ‘fuel’ e recuperacion economico di nos pais mas ainda, Minister Croes a expresa.
Pa conclui, Minister Croes como Minister di Labor, Energia y Integracion formando parti di Gabinete Wever – Croes II a duna di conoce di ta orguyoso di locual por a realisa pa comunidad durante apenas 1 aña di gobernacion.
“Nos ta sigui cu e compromiso pa cumpli cu expectativanan na bienestar di henter pueblo”.