ORANJESTAD – Awe mainta e homber Z.R.T. (24), a presenta den Corte pa e caso penal cu Ministerio Publico a cuminsa contra dje.
ARUBANATIVE por a compronde cu Fiscal ta haya Z.R.T. culpable di intento di mata. Z.R.T. a bisa Hues cu e ta para pa loke el a haci dia 25 Januari 2022 dilanti Blue Moon. El a bisa Hues cu e mester a actua contra dos homber cu a saca un arma p’e.
E acusacionnan cu Fiscal a presenta ayera mainta contra Z.R.T. ta cu dia 25 Januari 2022, el a purba mata un homber dilanti Blue Moon. Tambe Fiscal ta acusa Z.R.T. di posecion di arma di candela. E otro acusacion cu Fiscal a presenta contra Z.R.T. ta cu riba e mesun 25 Januari 2022, den dia e lo a tira riba un cas den Pindastraat. Fiscal ta haya cu esaki tambe ta intento di mata, pasobra tabatin hende den e cas y bala a bay te den e cas.
TIRAMENTO NA BLUE MOON
Hues a bisa cu 25 Januari 2022, Z.R.T. a tira riba un persona. Segun Z.R.T., dos persona cara tapa a saca arma riba dje y el a tira. El a bisa cu e no a mira e video di seguridad cual Recherche a bisa di lo lag’e mira.
VIDEO DI TIRAMENTO DEN CORTE
Door cu Z.R.T. no a mira e video, Hues ta haya ta bon pa pasa e video den sala di Corte y confronta Z.R.T. cu e imagennan. Z.R.T. a mustra Hues riba e pantaya unda e grupo tabata para y ora el a cruza caminda nan a tira palabra p’e. Segun Z.R.T., el a bay papia cu su amigo C. y e momento ey nan a tira palabra p’e. El a puntra nan kico ta e problema y el a mira esun cu capuchon a saca arma y arm’e. E momento ey e amigo C. a bay riba e persona. Segun Z.R.T. e luchamento entre e dos personanan ta C. tabata lucha cu esun cu e arma. Hues y Fiscal a bisa cu por mira claramente cu Z.R.T. a tira riba e persona, ora el a core bay. Segun Z.R.T. e no a tira riba e persona sino unda no tin hende para pa asina spanta e persona.
TIRA RIBA CAS
Den Pindastraat, Dakota, tabatin un tiramento 25 Januari 2022. Z.R.T. ta desmenti cu el a tira eynan. Hues a bisa cu un bala a bay den e cas caminda tin hendenan. Hende riba un scooter y un brommer a pasa tira y un di e personanan tabatin cabey rasta. Z.R.T., kende tin cabey rasta, a bisa cu Recherche a bis’e cu e persona tabata bisti na preto siendo cu e tabata bisti cu flanel blanco. El a bisa cu e tin un scooter y door cu tabata Dia di Betico e tabata core den gruponan di brommer. Segun Z.R.T. e tabata na su cas ora e tiramento a sosode. Den oranan di merdia e tabata na Palo Marga pa wak drag. El a bisa cu e tin bon amistad cu esnan den Pindastraat y no tin problema cu nan. El a bisa cu tur dia e ta den Dakota. El a bisa Hues cu e tabatin un pistool 9 mm y a tir’e afor despues di a tira na Blue Moon pero Recherche no a haya e arma. E tabatin e arma 6 pa 8 luna.
FISCAL A EXIGI 6 AÑA DI PRISON
Fiscal a bisa cu Z.R.T. ta admiti di a tira dilanti Blue Moon. Polis a bisa cu Z.R.T. a resisti. Un guardia a bisa cu ta Z.R.T. a tira. Ariba video di seguridad por mira kico tur a pasa. Por mira cu Z.R.T. tabatin un pistool color nikkel y a tira den direccion di e homber cu a core bay. Fiscal ta haya cu Z.R.T. por a herida otro hendenan cu tabata para ey banda ora el a tira. Esaki Fiscal ta considera intento di mata mirando cu Z.R.T. a dirigi arma riba e persona y a tira diferente biaha. Segun Fiscal, subsidiario Z.R.T. por a causa herida severo. E no ta haya cu aki ta trata di premedita y a pidi pa declara Z.R.T. liber pa esaki. Fiscal ta haya cu Z.R.T. tabatin un arma den su poder.
NO A TIRA RIBA CAS
Pa loke ta e tiramento na Pindastraat, esaki a sosode algun ora promer cu e incidente na Blue Moon. A haya 3 huls di bala y impacto di bala riba e cas. Nan a bisa cu un scooter color blauw y un brommer a pasa los tironan. Un di e personanan tabatin cabey rasta. A mira cu e arma ta color di nikkel cu ta mesun color di arma cu Z.R.T. a usa na Blue Moon. Fiscal ta haya cu no tin suficiente prueba cu ta Z.R.T. ta esun cu a tira. El a pidi Hues pa declara Z.R.T. liber pa esaki.
Fiscal a bisa cu posecion di arma di candela ta un problema hopi serio na Aruba. Fiscal a exigi 6 aña di prison pa Z.R.T.
Hues, despues di a scucha abogado a sera tratamento di e caso y a bisa cu e ta bay studia e caso y 22 Juli 2022 pa 10’or di mainta lo tin sentencia.