Home Politics Parlamentario Marco Berlis (MEP):  AVP y MAS hungando politica pa stop...

Parlamentario Marco Berlis (MEP):  AVP y MAS hungando politica pa stop e pago di 5% pa miles di ambtenaar

SHARE

 

Falta di seriedad y respet di fraccion di AVP pa nos profesionalnan!

 

Durante di debate entre parlamentario riba e Ley di LNT, sr. Mike de Meza a bagatelisa cu niun profesional hamas lo tuma e puestonan di director of un puesto den e board di directornan na pais su institutonan semi estatal. Esaki pa via cu gobierno via di e ley di LNT mester reduci salarionan hopi halto como condicion di Hulanda, cu ta varia entre sumanan di 100mil-30mil pa luna. E suma y cap cu e ley di LNT  ta pone awor pa directornan ta 21.750 florin pa luna. Den su disertacion di prome tanda Sr. de Meza a bisa cu esnan cu lo bay aplica pa director pa un compania estatal di awor enadelante lo ta hendenan sub-standard. Sr. de Meza a bisa cu nan lo ta bao nivel y cu e companianan estatal nunca mas lo por haya hende di nivel halto mas. Ademas el a declara cu solamente lo por haya payaso y macaco pa yena e vacaturanan di profesionalnan cu e salario di pinda cu kier ofrece via di LNT na e directornan. Di e forma aki AVP, especialmente de Meza, a insulta y categorisa profesionalnan y cualkier otro persona cu si ta desea pa asumi e reto di director di un compania estatal di un forma masha baho mes. Tristo realidad ta keda cu 27 mil pa luna ta ekivalente na 23 salario minimo, pero esaki no ta suficiente pa de Meza. 

 

Esaki el a bisa despues cu sr. Hendrik Tevreden a presenta un amienda cual lo cambia e ley y e suma aki pa 27 mil florin pa luna. Amienda cu henter fraccion di AVP y MAS a vota contra di dje! Recientemente nos por a wak cu dos profesional bon studia y cu hopi experiencia a bira director di WEB Aruba N.V. y Elmar respectivamente. Ambos profesional bon califica y cu experiencia pe puestonan aki. Ta lamentabel cu Mike de Meza por a ofende, insulta y benta dos profesionalnan bao bus, djis pasobra su fraccion kier a hunga politica barata cu e ley di LNT. E dos profesionalnan aki cu a bira director si a considera un bon oportunidad e salario y beneficionan cu nan a haya ofreci. 

 

Nos tur por corda con AVP y MAS a hunga politica extenso cu e 12.6% y awor cu esaki lo por wordo paga bek, a bira rol y kier a boycotia e ley di LNT votando contra di esaki y alabes pa trata na stop e pago bek di 5% pa e ambtenaarnan. E mesun ambtenaarnan cu nan a “pretende” di ta luchando p’e. Pa MAS Y AVP ta mas importante pa sembra odio y infelicidad den pueblo cu pa yuda e pueblo den e momentonan di crisis aki. Aki nos por wak e hipocrecia di MAS Y AVP manifesta na su forsa maximo!  

 

No ekiboca bo mes cu AVP y MAS. Ambos arma cu politiconan di experiencia y studia pero cu hunto a destrui economia y dignidad di pais Aruba. Un AVP cu investigacion tras investigacion criminal y awor ta uni hunto cu MAS. MAS cu ta un extension di AVP, un ex-politico di AVP, cual su lider TAMBE ta bezig ta wordo investiga den e caso cu antes tabata wordo yama Aloë, awor ta yama KUKWISA. Pronto pueblo lo scucha mas di esaki.

 

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!