Elliott ‘Lefty’ Loonstra PLY a termina su participacion na e di 5 lugar den e 2022 Eurpean Para Taekwondo Open Championships. Esaki ta su prome biaha participando na e ‘continente bieu’. Diasabra 21 di mei 2022 tabata e dia di competencia den su categoria di K44 Masculino -80 kg. E dia ey Elliott no a lanta bon di salud y tabata sinti su mes hopi malo y hunto cu su coach Luciano Mazzeo tabata mirando e opcion pa no participa ya cu e no tabata den condicion di duna bataya. Finalmente a dicidi pa toch participa como cu e puntonan ta hopi importante pa por mantene su ranking mundial y lo bay ta evaluando su condicion durante di su pelea.
Den e cuarto final el a enfrenta Turkia. Esaki ta un equipo hopi poderoso y un di e mas grandi e imponente na mundo. E combate ta di 1 (un) ronda di 5 minuut cu time-out cu por wordo pidi pa cada coach di 30 seconde. Den e prome minuutnan e Turco tabata tin e bentaha pero poco poco Elliott a sera esaki cu na 5 seconde prome cu final di e ronda e score tabata 9-7. Elliott lo por a iguala e score pero lamentablemente e Turco a subi e puntuahe cu un scop y asina a finalisa e pelea 11-7 na favor di e Turco cu a gana y asina a pasa pa e semifinal.
E campeonato Europeo ta un paso mas serca di e Grand Prix cu pa prome biaha den historia di Para Taekwondo lo tuma lugar na Sofia, Bulgaria riba 6 di juni 2022. Solamente e prome 15 atletanan den e ranking mundial por participa na esaki y ‘Lefty’ ta number 7 na mundo.
Nos atleta Paralimpico Elliott Loonstra PLY ta desde 23 di mei 2022 na Sofia, Bulgaria ta preparando su mes duro y cu concentracion fuerte hunto cu su coach Luciano Mazzeo pa e cita historico aki y asina pone e nomber y bandera di Aruba lo mas halto posibel na mundo.
Nos kier desea Elliott Loonstra PLY y su coach Luciano Mazzeo tur clase di exito durante di e competencia aki. Alabes un agradecimento grandi ta bay na Famia Loonstra pa nan apoyo continuo y tambe na pueblo di Aruba cu semper ta mustra un cariño incondicional na Elliott via medionan social.
#ParaTaekwondo #ArubaParaTaekwondo #WorldParaTaekwondo #ArubaParalympic