Casibari – Project Team Drugspanden un biaha mas tawata activo, e biaha aki na e mesun cas cu a drenta algun luna atras, pues tin hende gewoon no ta siña.
Dialuna merdia autoridad hunto cu funcionarionan di Ministerio Publico a drenta un cas na Casibari ya hopi bon conoci pa nan. E biaha un total di 6 persona a wordo aresta, entre e adultonan por a mira un mucha homber(13) cu polis a pone un serbete ariba su cabes esaki debi cu e ta menor. Algo lamentabel cu un mucha mester lanta den un ambiente manera esaki.
Un Altezza preto tambe a wordo confisca.
Siguientemente relato oficial di parti Vocero Policial Sr. Laclé:
“Project Team Drugspanden ta un team cu a wordo lanta pa entre otro pa investiga bendemento di droga for di un percela y ariba caya.
En conexion cu un investigacion andando Project Team Drugspanden a haci entrada hudicial na un cas na Casibari.
Aki a detene 5 hende homber di inicialnan:
S.Y.V. K. naci na Aruba di 23 aña.
J.A.N. K. naci na Aruba di 13 aña.
J.C. L. naci na Aruba di 18 aña
B.J.J. K. naci na Aruba di 19 aña.
M.G. Q. naci na Aruba di 31 aña.
Y un hende muher di inicialnan:
V.E. N. naci na Aruba di 67 aña.
Durante razzia na e cas na Casibari a confisca un cantidad di placa y un cantidad basta grandi di droga entre otro piedra y cocaina.
Pa Cuerpo Policial por resolve mas caso cooperacion y informacion di pueblo di Aruba ta hopi importante, pesey nos ta pidi si bo tin cualkier informacion yama nos tiplijn di Polis cu ta: 11141. Nos ta garantisa cu bo ta keda anonimo pa bendemento di droga”.
