ORANJESTAD – Awe mainta Hues via video conference, a dicta sentencia den e caso penal cu Ministerio Publico a cuminsa contra e homber S.S.(21).
ARUBA NATIVE por a compronde cu S.S. ta wordo haya culpable di a tira riba e homber K. cu un pistol Baretta y herida K. na su man.
Algun siman pasa tratamento di e caso a tuma lugar caminda Fiscal a bisa Hues cu a keda proba cu S.S. a tira. E no ta haya cu aki por papia di defensa propio. Fiscal a mustra cu na dado momento durante un discusion, S.S. a saca arma y los tiro. Un bala a herida e homber K. na su man y un otro bala a dal contra e auto den cual e dama M. tabata sinta. E ta considera esaki un intento di maltrato severo. Fiscal a pidi Hues pa declara S.S. liber di intento mata.
FISCAL
Fiscal a bisa cu den e situacion caminda K. lo a bay riba mama di S.S. cu un machete, S.S. por a tira den halto of cana bay pero no bay tira riba e homber K. Fiscal a exigi 3 aña di prison, kitando e tempo cu S.S. ta sera den KIA. Tambe Fiscal a exigi pa destrui e arma y balanan. E auto confisca lo mester bay pa e doño, kende no ta S.S.
HUES
Awe mainta Hues a bisa cu mescos cu Fiscal, e no ta haya proba e acusacion di intento di mata. Hues a bisa cu a keda proba intento di maltrato severo, door di tira y herida K. den su man. Na opinion di Hues, no a keda proba cu S.S. a purba herida e dama M.
Hues a mustra cu S.S. a bisa cu el a tira riba K. pasobra K. a menaza su mama cu machete. Hues a rechaza esaki pasobra na opinion di Hues, e momento ey ya e mama a core bay. Hues ta haya cu S.S. por a tira den halto.
Hues a condena S.S. na 3 aña di prison di cual 6 luna ta condicional cu 2 aña di prueba. Durante e 2 aña di prueba, S.S. ta cay bou guia Reclasering. Hues a duna orden pa destrui e arma y e auto lo mester debolbe na e doño.