Un organisacion criminal a wordo desmantela, e organisacion aki durante un aña di operacion a gana centenares di miyones di Euro. Tur cos a cuminsa cu un investigacion relaciona cu un traficacion di droga, cu a resulta di tabata pertenece na un organisacion criminal internacional grandi, 21 persona aresta y miyones di Euros na droga y placa confisca.
Amsterdam:
E investigacion a inicia na november 2021 despues cu autoridad a bin topa cu un truck di carga, di un compania di transportacion di Ijsselland. E cargamento tabata destina pa Stockholm, cu ta e capital di Zweden. Den e truck Douane a bin topa cu mas di 300 kilo di hasj y 20 kilo di cocaina. E droga aki tabata tin un balor riba caya di mas o menos 8 miyon Euro.
Gobierno di diferente pais, entre otro Aruba a coopera
Despues cu Douane Hulandes a confisca e droga a cuminsa cu un investigacion, durante e investigacion autoridad a haya cooperacion di instancianan gubernamental di Belgica, Ierland, Zweden Denemarken y Aruba. E cooperacion internacional aki a resulta di tabata hopi exitoso, den 5 luna di tempo a logra detene 21 sospechoso, tin di e sospechosonan aki cu ta hopi mas involvi y otronan cu tabata menos envolvi den e organisacion criminal internacional.
Entradanan hudicial
Den E cooperacion aki tabata envolvi entre otro NVWA, Douane, FIOD, Belastingdienst, Polis di Ierland, Zweden, Denemarken, Europol y diferente unidadnan policial mas. Durante e investigacion, den e ultimo lunanan autoridad a haci diferente entradanan hudicial y aki a confisca cargamentonan grandi di droga y arma.
Transporta droga den containernan di Fruta y palo
E organisacion tabata trafica droga for di Sur America den containernan di fruta y Palo di Teak pa Europa. Varios cargamento di droga cu tabata gelink cu e grupo aki a wordo intercepta. Tabata trata di casi 1200 kilo cu un balor di riba caya di 35 miyon Euro. A base di e informacion haya for di e investigacionnan haci, a bin saca afo cu intercepcion di otro cargamento di droga tambe tabata pertenece na e organisacion criminal aki.
Propiedad cumpra cu placa di droga a wordo confisca
Aki a confisca como 2800 kilo di harddrugs. Polis a confisca propiedadnan di e sospechosonan, cu probablemente lo a wordo cumpra cu placa gana for di e mundo criminal. For di un investigacion financiero, autoridad a bin haya sa cu e organisacion aki den un aña probablemente a gana centenares di miyones di Euro cu traficacion di droga.
Detencionnan haci entre otro na Aruba tambe
E 21 sospechosonan a wordo aresta luna pasa. Ta trata di dos muhe y 19 homber nan edadnan ta varia di 23 te 59 aña. Den Reino Hulandes detencionnan a cay na Flevoland, Noord-Holland, Utrecht, Gelderland, Noord Brabant, Zuid Holland y Aruba. E investigacion ainda ta andando y NO ta descarta cu lo por cay mas detencion, entre otro na Aruba.