Saba, Caribe Hulandes –. E metodonan di restauracion di rif di coral ta mustra resultado prometedo den apoyo na e esfuersonan regional pa restaura e rifnan di coral degrada den Caribe Hulandes. P’esey, Aliansa pa Naturalesa di Caribe Hulandes (DCNA) ta organisa un tayer di restauracion di rif dirigi pa University of Applied Sciences Van Hall Larenstein (VHL) dia 5 y dia 6 di april na Saba. E tayer aki lo involucra biologo di rif di coral, experto den restauracion di coral y gerentenan di e parkenan marino di varios isla di Caribe pa enfoca pa di prome biaha riba restauracion di un aspecto clave y importante riba rif: Diadema antillarum, bushi di lama di spina largo.
Importancia di e bushinan di lama Diadema
Rif di coral saludabel ta esencial, ya cu nan ta un magnet pa turista y, na mes momento, un di e fuentenan di ingreso mas importante pa Caribe Hulandes. E bushinan di lama di spina largo (nomber cientifico Diadema antillarum) ta hunga un papel fundamental den mantencion di rif di coral saludabel. Nan ta yuda mantene e ekilibrio delicado den e rifnan door di alimenta nan mes cu alga, cu ta e principal competido di e coralnan. Desafortunadamente, memey di e decada di 1980, un malesa a extende su mes den Caribe y a caba cu casi tur e poblacion di bushi di lama. Poco despues, a documenta informacion di crecemento rapido di alga den henter Caribe. E alganan ta ocupa henter e espacio disponibel, impidiendo reclutamiento di coral y limitando e capacidad di rif di coral pa recupera di otro disturbionan. Te awor, recuperacion di e poblacionnan di Diadema antillarum a bay masha pocopoco te pa inexistente. Den e poco areanan unda e bushinan di lama tabata por a recupera di forma natural, e tendencianan aki a bay atras, destacando importancia di restaura e especie clavenan aki.
Tayer di enfoke
Den e Proyecto RAAK Pro Diadema VHL ta traha den colaboracion estrecho cu otro institutonan di investigacion y socio local pa restaura e poblacion di e bushinan di lama di spina largo den e rifnan di coral rond di Saba y Sint Eustatius. E proyecto aki ta mustrando resultado prometedo. E investigadonan principal Alwin Hylkema y Tom Wijers ta bay comparti nan hermentnan impresionante, tecnicanan y e ultimo hallazgonan cientifico pa facilita restauracion di Diadema den e region di Gran Caribe durante e tayer DCNA.
E tayer lo concentra su mes den e contexto historico y e estado di e herbivoronan reduci aki y lo introduci tecnica di restauracion di Diadema cu a mustra resultado prometedo. Tambe tin sesion di capacitacion practica riba agenda pa mehora e habilidadnan practico relaciona cu restauracion di Diadema. Tambe lo pone atencion na e reciente eventonan di die-off di Diadema den Caribe y un actualisacion di e ultimo hallazgonan. Lo ta posibel pa sigui algun sesion den vivo online pa hende cu ta traha den e campo aki, kendenan no por asisti personalmente.
Durante e dianan ta bay tin dialogo intenso entre e islanan pa intercambia conocemento local, comparti experencia, stimula cooperacion unda ta adecuado y revela e hermentnan necesario pa mengua perdida di Bushi di lama Diadema.
Cambio di wega den restauracion di rif
Restauracion di rif di coral den Caribe Hulandes ta enfoca su mes particularmente riba e coralnan. E tayer aki ta basa riba investigacion y innovacion cu ta introduci restauracion di e importante herbivoro di alga Diadema. Door di restaura e herbivoronan banda di e coralnan e coralnan lo tin mas chance di sobrevivi. Bushi di lama spina largo ta alimenta nan mes cu alga, cu ta un competido importante di e coralnan. Door di crea sustrato seco, e bushinan di lama tambe por facilita reclutamento natural di coral.
Salvaguarda rif di coral
DCNA ta haci tur esfuerso pa salvaguarda naturalesa, incluyendo nan extraordinario rifnan di coral den Caribe Hulandes. E menasanan local significativo cu mester wordo aborda pa salvaguarda e rifnan ta inclui desaroyo (di costa) mal regula, maneho di awa residual y desecho, asi como e pastoreo excesivo. Ademas, e falta di financiacion sostenibel y apoyo politico ta dificulta maneho di e conservacion.
Ademas di esaki, e restauracion di e rifnan di coral ta un componente importante. Tanto e restauracion di e coralnan como bushi di lama Diadema por yuda salva e rifnan di coral cu ta importante pero tambe fragil y haci nan mas resistente na e impactonan di cambio climatico.
E tayer aki ta generosamente financia pa Ministerio di Agricultura, Naturalesa y Calidad Alimentario(LNV) como apoyo na e Plan di Politica Ambiental y di Naturalesa pa e islanan BES, Loteria di Codigo Postal Hulandes y SIA, parte di Conseho di Investigacion Hulandes (NWO) .
Keda al tanto
Si ta desea di haya mas informacion tocante e tayer di Diadema y e actividadnan di DCNA, sigui DCNA a traves di su boletin digital gratuito BioNews (https://dcnanature.org/news/), Facebook (Dutch Caribbean Nature Alliance) of Instagram (DCNAnature). Pa haya mas informacion tocante e proyecto RAAK PRO Diadema, sigui https://www.facebook.com/reefrestorationVHL/ of comunica cu e lider di proyecto [email protected].
Pa haya mas informacion tocante e tayer Diadema, comunica cu:
Tineke van Bussel, liason di comunicacion di investigacion den [email protected] y
Dahlia Hassell – Knijff, Oficial di Proyecto na [email protected]
Potret 1. Bushi di lama spina largo, Diadema antillarum riba rif.
Credito di potret: MMBockstael – Rubio