Resientemente Dutch Caribbean Nature Alliance (DCNA) a sostené presensia di representantenan di organisashonnan di maneho di Área Protehá di Aruba (Fundacion Parke Nacional Aruba), Boneiru (STINAPA), Saba (Saba Conservation Foundation) i St. Maarten (the Nature Foundation) na un tayer di trabou di BirdsCaribbean tokante vigilansia di paranan terestre na Jarabacoa, Repúblika Dominikana. E partisipantenan a risibí training di oumentá kapasidat pa vigilá para terestre den e region amplio di Karibe.
Vigilansia di e salú di e populashon di paranan terestre ta di vital importansia pa komprendé e kambionan den grandura di populashon i distribushon di espesie, komo reakshon riba kambionan ambiental i menasanan manera kambio di klima, polushon, espesienan invasivo, desaroyo, orkan, erupshon di volkan i mas. Vigilando e salú di e populashon di paranan terestre den Karibe Hulandes, managernan di konservashon lo por haña un mihó bista riba kon ta bayendo ku e espesienan akí i ku e área di naturalesa kaminda nan ta biba. E datonan ku nan kompilá lo yuda e tumadónan di desishon pa plania akshonnan di konservashon i maneho pa sigurá ku e paranan fasinante di Karibe Hulandes lo ta presente pa nos yunan i nietunan mira i disfrutá di nan.
Nos ta agradesido na Birds Caribbean pa a organisá e tayer di Training di e Trainer. Ku e abilidat ku a siña durante e tayer nos lo oumentá e manera ku nos ta protehá nos áreanan di naturalesa terestre ku ta algun di e espasionan mas menasá riba nos islanan,” Tadzio Bervoets, direktor di DCNA a komentá.
E partisipashon di konservashonistanan lokal kalifiká na e tayer di trabou a bira posibel ku sosten di ‘the US Fish and Wildlife Service Neotropical Migratory Bird Conservation Act Fund’, ‘Environment and Climate Change Canada’, ‘US Forest Service International Programs, Optics for the Tropics’, i DCNA.
–
Nota pa Redakshon:
Riba pòrtrèt di man robes pa man drechi: Kai Wulf, Direktor di Saba Conservation Foundation; Karen Eckrich, Biólogo di STINAPA Bonaire; Melanie Meijer Zu Schlochtern, Manager di St. Maarten Nature Foundation; Tadzio Bervoets, Direktor Dutch Caribbean Nature Alliance; Giancarlo Nunes, Conservation Manager Aruba National Parks Foundation; Jilly Sarpong, Terrestrial Park Ranger STINAPA Bonaire; na e tayer di “the BirdsCaribbean Terrestrial Bird Monitoring Workshop“ na Jarabacoa, Repúblika Dominikana (Fuente di pòrtrèt: Giselle Dean, Bahamas National Trust).