ORANJESTAD – Aruba Airport Authority N.V. (AAA) su Wings of Hope (WoH) a hasi entrega oficial di un “Dog Nursery” na Luna Foundation dia 25 di Februari 2022 hunto cu un donacion di cuminda di cacho hasi dor di AAA su empleadonan.
Na 2021, WoH a reuni cu Luna Foundation unda cu nan a presenta nan proyectonan cu ta andando caba y cu ta programa pa cuminsa parti den 12 diferente fase pa asina crea un espacio mas grandi, mihor y sigur pa e cachonan cu ta malo, a wordo abusa of cu tin mas aña. Tabata e momento aki cu WoH a dicidi pa tuma fase 3 over y asina crea un “Dog Nursery” unico y bunita pa Luna Foundation como parti di WoH su metanan “Partnership” y “Environment/Sustainable Airport Community”. E “Dog Nursery” ta pa por duna e cachonan cu ta cla pa duna luz of esnan cu ta malo e cuido necesario te ora cu nan ta capaz y fuerte suficiente pa cuida nan mes.
Cu un container recicla ricibi for di Luna Foundation, WoH conhuntamente cu diferente partners a renoba e interior cu muraya-, waya di coriente-, vloer-, tegel-, bentana-, porta, sink y cabinet, verf, air conditioning, 3 cama pa cacho separa cu porta pa duna suficiente espacio pa cada cacho por wordo trata den e mihor manera posibel y e exterior a haña un entrada y dak nobo pa duna suficiente sombra.
WoH ta orguyoso di por duna Luna Foundation nan “Dog Nursery” cu tanto nan tabata kier pa asina nan por sigui cuida e cachonan. Pero, partnership tabata super importante pa e proyecto por ta exitoso y WoH kier gradici specialmente ELJO Construction N.V., Kooyman Aruba N.V., Rotech Electrical N.V., AA Installatie Groep N.V., BBS Kitchens N.V., Aluberg Aruba N.V., Accurate Installation Company N.V., Bon Bini Cargo N.V., Banjolux N.V. y Abeso Roofing N.V. pa duna e materialnan necesario pa construi, electricidad, instalacion di tuberia, y pa e dak, air conditioning, cabinet, porta- y bentanan di aluminum, transporte y labor.
Por medio di WoH, AAA lo sigui enfoca riba e Sustainable Development Goals di United Nations (SDGs) cu lo sirbi como guia pa e proyectonan cu ta sigui contribui na e bienestar, desaroyo y sostenibilidad di e comunidad di Aruba.
