ORANJESTAD – Durante e celebracion di 30 aña di Ataniro den farandula den un sala completamente yen di Cas di Cultura, Minister di Cultura a dirigi algun palabra na tur presente. Minister Xiomara Maduro na nomber di Gobierno di Aruba, a felicita y otorga Ataniro un reconocimento como muestra di aprecio pa su aporte na cultura di Pais Aruba y su aprecio pa nos dushi Papiamento.
Durante su discurso Minister Maduro a recorda con Janiro Eisden a inicia su carera den musica. Como un hoben yen di curashi ela lanta e banda ‘Basic One’ y a cosecha exito cu e cancion ‘Suave’. Despues di esaki tur aña Niro ta produci tres pa cinco cancion cu ta figura den Top 100 di nos radionan emisora y tambe na nos islanan ruman, caminda ela bira un eminencia.
E mandatario a sigui bisa cu Janiro ta haci historia como e prome ‘rapper’ cu a ‘rap’ na Papiamento na Aruba ya cu esaki ta un genero di musica cual e idioma ingles tabata domina. Ela demostra su aprecio pa nos idioma y a haci cu e ‘rap’mento den nos idioma Papiamento, a bira popular y a bira parti di cultura di nos Pais. Janiro a haci hopi frase cu e ta usa den su cancionan, bira un dicho den Papiamento, ya cu por ehempel ora nos ta pasa bon, nos ta bisa ‘E cos aki ta dushi, e cos aki ta dushi mes’.
Janiro ta hopi orguyoso di su distrito San Nicolas, caminda cu ela nace. Esaki e ta demostra door di graba su videonan den San Nicolas cu actuacion di e hobennan di San Nicolas. Ta di admira con e ta yuda promove e distrito cu a wake nace y crece den su carera musical.
Ataniro a participa tambe varios biaha na Calypso contest y a sali e cantante mas popular. Ela subi e tarima di Tumba Festival na Aruba y tambe na nos hermana isla Corsou. Na Aruba ela sali na segundo luga y na Corsou ela clasifica den final y a marca historia ora su cantica a sali e cantica popular di caya na aña 2015.
E mandatario ta gradici e hobenan di ‘Gang di Arte’ y ‘Dream Dare Do’ cu a bini cu e iniciativa pa e celebracion aki y cu hunto cu Departamento di Cultura a hinca un bunita show den otro y dedica esaki na Ataniro. Un palabra di gradicimento tambe na Fundacion ‘Everything is Possible’ y ‘Centro di Bario Dakota’ cu tambe a coopera pa haci e evento aki posibel.
