ORANJESTAD – Recientemente, Minister di Husticia y Asuntonan Social Sr. Rocco Tjon, a bishita post Tango di Brandweer, caminda a reuni cu representantenan di e compania Mericano esta; Rosenbauer, kende a produci e tankwagen special pa cuerpo di bombero. Minister Tjon, a gradici ex-Minister Sr. Andin Bikker, kende a inicia e proyecto aki, di cual awe ta mira su fruto. Na December 2021, a aproba cinco miyon florin, pa asina por adkiri trucknan nobo y marterialnan necesario, pa percura cu Brandweer tambe por keda actualisa.
E prome tankwagen nobo a yega di e proyecto cu a wordo inicia pa Minister di Husticia anterior esta; Sr. Andin Bikker, kende a pidi aprobacion riba presupuesto den parlamento pa por busca e truck aki na Juli di aña pasa. Pues, un pabien na ex-Minister Sr. Bikker como tambe na e cuerpo di Bombero di Aruba y SINBA, cu a lucha pa hopi tempo pa por yega na e materialnan necesario.
Manera ta conoci na December di 2021, a aloca alrededor di cinco miyon florin pa por adkiri mas truck. E representantenan di e compania Rosenbauer a duna un indicacion cu e siguiente trucknan lo yega na Juli binidero, y e otro trucknan cual ta e “spuitwagens” lo yega Aruba na inicio di 2023. E Mandatario a indica cu Brandweer ta hayando su debido atencion, no solamente den e parti di material pero tambe pa loke ta e “blusbakken” cual a wordo pidi caba. Adicional na esaki, ta asina cu Ministerio di Husticia y Asuntonan Social ta reuni cu Brandweer cada dos siman, pa e parti di nan organisacion como tal, pues e parti di “bedrijfsvoering” y “rechstpositie”.
Por ultimo, e Mandatario a duna un danki grandi na e ekipo di Ministerio di Husticia y Asuntonan Social, specificamente e departamento di asuntonan huridico como tambe e departamento di asuntonan di finansas, mirando cu sin nan ayudo esaki no lo por tawata un realidad awe.