Oranjestad – Bibi Gibbs ta otro gran baluarte musico cuta bay laga nos.
Arnaldo Humberto Gibbs, miho conoci como ‘Bibi’, kende a nace riba 2 di juli 1966 y a fayece dia 8 di februari 2022 na Colombia.
Den persona di Bibi Gibbs Aruba ta perde otro gran baluarte musico y gran trombonista, kende a contribui grandemente den Aruba su cultural musical, deporte y un gran persona, amigo, un agente policial di KPA y un bon tata di famia. Bibi hunto cu su compañera Milusca Maduro, nan tin un yiu Arnalda Gibbs.
Cu edad hopi hoben Arnaldo ‘Bibi’ Gibbs a cuminsa practica algo cu e tabata gusta hopi: Esta ‘Baseball’. Hunto cu su ruman grandi Austis, nan tabata train den cura, p’asina despues hunga e posicion di ‘catcher’ den e ekipo di Little League Sapolin’.
Bibi su prome experencia musical tabata cu e ‘Brassband’ di Scout di San Nicolas.
Na un edad di 13 aña, Bibi hunto cu su ruman Austis, a cuminsa toca cu ‘Dynamic Sound’, y un aña despues nan a pasa pa ‘Control Power’ pa algun tempo. Y El a sigui su carera musical despues cu ‘Akai Brass’.
Na aña 1988 ‘Bibi’ a bay milita den e banda; ‘The Musical Time’bou direccion di Sr. Elgin Juddan d.f.m. Cu ‘The Musical Time’el’a reprensenta Aruba internacionalmente na varios ocasion. Entre otro na Corsou, Boneiro, New York, Miami, St. Maarten. Akinan ‘Bibi’ tabata forma parti di un seccion di ‘brass’consistiendo di e Maestro Franklin Granadillo, Humphrey Hewitt, Eddy Ras y John Ras.
‘Bibi’ a forma parti tambe di e seccion di ‘brass’ di ‘Formacion PRIDE’ bou direccion di Juan Carlos ‘Bulu Viloria’ cu su amigonan Tarzan Jimenez, Oslin Trimon, Faroud Henriquez, Franklin Granadillo, John Ras y Larry Hoo.
Entre 1992 pa 1995, ‘Bibi’ tabata residencia na Hulanda, caminda el’a toca cu e banda musical ‘Los Barones’, hunto cu su amigonan Dolfi Richardson, Alfredo Ruiz, Franklin Giel y Giovanni Tromp. ‘Bibi’ a forma parti aya na Hulanda cu e agrupacion ‘Pegasaya’ hunto cu Jersey Isenia y Kenneth Thielman.
Despues na Aruba ‘Bibi’ a forma parti den ‘Super Orquesta Quasi’ bou direccion di Meiler Laurens d.f.m.
Tambe El’a forma parti di ‘Claudius Phillips y su grupo Oreo’, hunto cu Tarzan Jimenez, Reinaldo Suarez y Jovanni Romero riba ‘brass’. ‘Bibi’ hunto cu e Maestro Frank Granadillo, Brother Pantophlet, su Omo Bulto Gibbs, nan a toca den ‘The Aruban Band’.
‘Bibi’ a forma parti di ‘Caribbean Big Band’ bou direccion di e Maestro Eduardo Maya awe d.f.m.
Durante ultimo añanan ‘Bibi’ a forma parti di ‘Maestro Franklin Granadillo Big Band’, cual a sa di duna presentacionnan sublime durante e.o. ‘Caribbean Sea Jazz Festival’, y tambe a toca ribadianan nacional, manera 18 di maart etc.
Den Festivalnan di Calypso/Roadmarch y Tumba, ‘Bibi’ a sa di acompaña masha hopi cantante den e festivalnan aki, tocando pa mayoria bandanan local den un solo anochi di festival. ‘Bibi’tambe a acompaña diferente Rey/Reinanan den e festivalnan aki.
‘Bibi’ Gibbs a forma parti di diferente orkesta acompañando festival di calypso/roadmarch infantil, y tambe Tumberito.
Ademas di esaki ‘Bibi’ a forma parti di e ‘Drumbands’ di Douane, Brandweer, y di Cuerpo Policial Aruba, fuera di esey El’a forma parti di diferente ‘brassband’ local entre otro ‘Bad Boyz Brassband’.
Departamento di Cultura, director, staf y personal, y tambemusiconan, especialmente di e parti di ‘Brass Seccion’, deportistanan, miembronan di Cuerpo Policial di Aruba, amigo y conocinan di ‘Bibi’ ta duna palabra di condolencia y forsa na su famia sra. Milusca Maduro y yiu: Arnalda Gibbs, y demas famiaden e dianan dificil aki.
Un gradicimento na ‘Bibi’ pa su gran contribucion na Aruba su cultura musical y pa tur loke el a laga atras como bon ehempel pa nos hobennan.
Compila pa John Ras y Departamento di Cultura Aruba.
16 februari 2022
