Home History of Aruba Historia di Aruba: Un accidente cu 4 morto y 7 herido, cu...

Historia di Aruba: Un accidente cu 4 morto y 7 herido, cu a haci un impacto grandi riba Aruba, na 1970

SHARE

E biaha aki nos lo dedica Historia di Aruba na un accidente fatal, cu a costa bida di 4 persona y 7 persona cu a keda herida. E autonan a keda ireconocibel.

Esaki ta un peticion cu nos a ricibi for di un señora cu a mira e accidente aki pasa y a pidi nos pa traha e historia aki. E accidente a haci un impacto grandi riba e señora aki specialmente ora a saca e criatura di 3 aña y su mama. Despues di mas cu 50 aña, e  la conta nos kiko tur e la mira.

Na Aruba a yega di pasa hopi accidente y varios di nan cu a haci un impacto grandi riba nos hendenan. Accidentenan cu decadanan largo ta wordo recorda, no solamente pa famianan cu a perde nan ser keri, pero tambe otronan cu a mira of experiencia un di e accidentenan aki. .

E bario di Tanki Leendert tabata testigo di varios accidente cruel y fatal

Un accidente fatal den cual tres mucha chikito (8,6,4) a perde nan tata y mama, un yiu di 3 aña a perde su tata y un otro persona cu tabata cu vakantie na Aruba a fayece lagando su famia na Corsou tristo atras.

Yegada na Aruba
Riba 15 di December 1969, famia Andries Picaulij(41) y Sonja Picaulij (38) a yega Aruba hunto cu nan tres yiunan, un di 8, di 6 y di 4 aña. E famia a bin Aruba pa motibo cu Andries a haya trabou como maestro na e tempo ey Mater Luther King School, cu tabata e Technische School na San nicolaas. Andries a bay duna les di carpinteria.

Casi 8 mil kilometer leu di Hulanda
E famia tabata hopi contento, cu e oportunidad cu a wordo brinda na nan pa bin biba na Aruba. Un isla tropical den Caribe, casi 8 mil kilometer leu di Hulanda, caminda december nan a despedi di nan famianan pa bin biba na Aruba. Famia Picaulij tabata felis cu e cambio aki, di sneeuw, di frieu, ijs, awacero pa solo, calor, lama, beachnan blanco bunita y trankilidad. Pa Andries Picaulij, e no tabata nada nobo, e tabata conoce caba kiko ta biba den un pais tropical, pasobra e la nace y a biba na Indonesia, na Zuid Celebes, , Andries a nace dia 7 di juni 1928.

Evert Fekkes (32) tambe a subi avion riba 15 di december 1969, hunto cu su señora y nan yiu muhe chikito (3). Nan a biaha hunto cu famia Picaulij. Evert Fekkes tambe a haya trabou como meneer di scol na Prinses Irene School na San Nicolaas. Famia Fekkes y Famia Picaulij tabata bon amistad di otro.

Tur cos tabata mustra rustig y sigur pa famia Picaulij y Fekkes. Nan tabata pensa, Aruba ta un isla chikito, trankilo y un lugar sigur pa nan yiunan chikito por crece, biba y disfruta di nan infancia. Sin por a pensa kiko destino tabata tin entremanos pa e famianan aki.

Bay mira un cas na Tanki Leendert
Na januari, e famianan aki tabata buscando un cas pa huur of cumpra, nan a bay mira varios y tabata pendiente di un na Tanki Leendert. Durante e ultimo siman di januari 1970, un amigo di nan, Engelbert van den Berg a bin bishitanan for di Corsou y hunto nan a bay mira e cas na Tanki Leendert. E bishita na e cas na Tanki Leendert a cambia nan bida y di nan yiunan pa semper.

Tanki Leendert
Diamars, 27 di januari 1970 den oranan laat di atardi, Sonja y Andries Picaulij, Evert Fekkes, señora Fekkes, nan yiu muher Marjolein (3) hunto cu nan amigo Engelbert van den Berg tabata den un Fiat-125, nan a bay mira e cas na Tanki Leendert.

Destino a hunga nan un wega
Riba e caminda di Tanki Leendert pa Solito, destino a hunga nan un wega. E caminda e tempo ey tabata smal y sigur no den optima condicion, ya tabata birando scur y no tabata tin lus di caya. Probablemente Andries lo tabata stuur e auto,  na dado momento e la bay hala pa un ciclista. E la hala un poco di mas na su man robes y net na e momento cu for di direccion contrario tabata biniendo un van Ford-Taunus.

Cuater morto y 7 herido
E impacto tabata devastador, cuater persona a muri mesora y 7 persona a keda herida entre otro e den e ciclista cu den e impacto fuerte a wordo alcansa pa e Fiat di Andries. E consecuencianan tabata hopi horibel, cu despues di mas di 50 aña no tin palabra pa describi esaki.

Zonido fuerte
E habitantenan di Tanki Leendert for di masha leu a scucha un zonido masha duro mes. Despues di a scucha e zonido duro aki e e habitantenan y tur hende cu tabata den e area aki a core bay na e sitio di e accidente, pa mira cu nan mesun wowo kiko a caba di sosode. Locual nan a bin topa cu ne tabata un desaster grandi. Como mas cu 50 meter riba e caminda a keda cubri na partinan di e autonan. E Fiat a bay para te na e otro banda di caminda mientras e van a bay para algun meter mas leu  riba caminda.

Locual nan a topa den e Fiat tabata horroroso. E banda links di e auto tabata benta un 20 meter mas leu. E dak a kita completamente. Cuater ocupantenan di e Fiat-125 a muri mesora den e impacto fuerte aki.

Nomber di e victimanan
E victimanan Andries Pieter Picauly (41), su casa Sonia Louise E. Picauly Smith (38), Evert Fekkes (32), nan tabata tin un luna bibando na Aruba. E otro victima Engelbert van den Berg tabata biba na Corsou y a bin pasa algun dia cerca su amigonan.

Dos persona no a fayece
Dos persona cu tabata den e Fiat cu no a fayece, tabata señora Fekkes y nan yiu muher Marjolein(3). Mirando e seriedad di e accidente, e prome polisnan cu a yega na e sitio mesora a bati Groot Alarm.

Varios patruya di polis a dirigi nan mes cu hopi urgencia na e sitio y a cera e caminda pa tur trafico, pa asina polis y ambulance por a haci nan trabounan sin wordo stroba pa e mironesnan of autonan cu tabata pasando.

Mirones na cantidad
For di Oranjestad, Solito pa Tanki Leendert sirena di polis y ambulance tabata yora sin stop, esaki por a wordo scucha di leu. Riba e caminda tabata tin un cantidad di mironesnan cu tabata pura pa yega, pa nan por haya ainda un bista di e desaster cu tabata tin na e sitio.

Por a mira con autonan tabata traha caminda riba e pida tera canto di caminda pa asina trata na yega pa presencia con e autonan y victimanan a keda despues di e impacto fuerte aki. For di e caminda di tera banda di pabou un cantidad di auto tabata para y e ocupantenan buscando tur forma pa yega mas cerca cu ta posibel di e sitio di e accidente.

Dificultad pa a saca e curpanan for di e auto
E team di rescate a dura hopi prome cu por a saca e curpanan, nan tabata tin masha dificultad pa sacanan. E pareha Picaulij, e meneer Fekkes y Van den Berg a muri mesora na e sitio.

Señora Fekkes a keda gravemente herida, cu sla pisa na cabes, nan yiu muhe Marjolein Fekkes (3) a keda levemente herida.

Shete herido, incluyendo e ciclista
E heridonan tabata e ciclista (53) cu den e impacto a wordo alcansa pa e Fiat-125, e la fractura su brasa.  Den e Van Ford Taunus tabata tin cuater persona tur a keda levemente herida y despues di un asistencia medico cortico na Hospital, nan por a bay cas.

E daño material tabata inmenso, den careda di 12 mil 500 florin, cu sigur na 1970 tabata un cantidad di placa.

Evert Fekkes a wordo dera na Aruba
Evert Fekkes a nace dia 09 di januari 1938 y a fayece riba 27 di januari 1970. E curpa di Evert Fekkes (32) a wordo dera dos dia despues, riba diahuebs, 29 di Januari pa 4’or y mey di atardi den santana Protestant na Oranjestad.

E curpa di Engelbert van den Berg a wordo manda Corsou, caminda e la wordo dera.

Tres criatura a perde nan mayornan den e accidente
Despues di e accidente, un di e coleganan di Picaulij lo a tuma e encargo di e yiunan di e pareha, mientras tabata reglando tur cos pa e muchanan por a bay bek cerca nan famianan na Hulanda. Un tristeza enorme, pa e tres criatura estando na un lugar hopi leu di nan famianan, apenas un luna na Aruba nan a perde nan mama y tata. Un tristeza cu no tin palabra pa consola e criaturanan aki.

Ken a tuma e muchanan (8,6,4) aki bou di nan encargo, no ta conoci, aparentemente tabata un colega di e tata. Ken a splica e criaturanan, cu ambos di nan mayornan no tey mas y cu nan mester bay bek Hulanda sin nan mayornan y cu nan mayornan lo yega Hulanda si pero den caha. Mester tabata algo hopi dificil pa esnan cu a tuma encargo di e yiunan di e pareha Picaulij y tambe pa e muchanan.

Santana Den en Rust na Bilthoven
E preparacionnan a wordo haci y e curpanan wordo manda Hulanda. Andries Pieter Jean Picualij y Sonja Louise Eveline Picaulij Smith ta dera na e santana Den en Rust na Bilthoven.


E accidente aki a sosode den careda di 6’or pa 7′ or di atardi, net pazuid di e rotonde actual di Watty Vos Boulevard na Tanki Leendert,  antes tabata tin un caminda di santo banda di pabou cu tabata sali riba e caminda di Tanki Leendert, pero ora a construi Watty Vos Boulevard a cera e caminda aki.