Oranjestad- 28 januari 2022. Tawata exactamente siman pasa den pleno luto di mi famia, cu mi persona a ricibi for di matutino Bon dia Aruba diferente pregunta “technico” relaciona cu e Aruba Health App. Den mi afan pa yuda tur hende, apesar di ta sentimentalmente kibra, mi persona a contesta Bon dia Aruba riba su preguntanan. “DVG no ta administra e Aruba Health App, pa porfabor tuma contacto cu Bureau di Minister su PR”. Esaki como cu mi persona no tawata tin e contesta riba e preguntanan “technico” cu a wordo haci na e momento ey, tampoco no tawata tin e tempo pa busca e contestaban aki debi na luto di mi famia y pa toch yuda Bon dia Aruba mi a opta pa referinan na Bureau di Minister Oduber cu sigur lo por a yudanan. Loke mi persona no a premira of por a biba pensa tawata cu mi palabranan mal escohi na e presiso momento ey, lo wordo uza pa causa disturbio y intrankilidad den comunidad y crea un impresion eroneo riba kende ta adminstra e Aruba Health App.
Como PR di DVG mi tin e deber pa aclarea mi contesta referente e Aruba Health App y pa coregi e informacion incorecto y brinda e informacion corecto na communidad.
1. DVG ta e opdrachtgever di Aruba Health App.
2. Informacion di vacuna ta wordo prosesa den e Aruba Health App.
3. Pa loke ta trata e boostershot esaki tabata na encargo di SETAR pa upgrade e systema asina e boostershot bewijs por a wordo uploaded.
4. Tur persona cu ta traha cu e Aruba Health App tin un contracto cu DVG y ta traha bou supervision di DVG y a firma un non disclosure agreement.
5. DATOS di e Aruba Health App ta wordo siministra door di DVG.
6. Creador di e Aruba Health App ta nos Compania Nacional Setar NV.
7. E privacidad di e datonan tecnicamente ta completamente salvaguardia cu e ISO certification di e cloud di Setar NV. DVG tambe ta inverti den e conscientisacion di personal.
8. Tur personal cu ta traha cu e systema a firma un Confidentiality Agreement” pa sigura cu e anonimidad di e datonan ta keda sigura
Den mi trabou, como consehero den comunicacion, relacionista publico di DVG y brindando sosten na Crisis Team den comunicacion atravez di e Crisis di COVID, mi semper a y lo sigui traha treciendo informacion corecto pa comunidad. Mi ta lamenta y pidi mi disculpa cu den mi momento di tristesa personal, mi palabranan mal escohi den mi buena fe pa yuda prensa apesar di mi situacion, por a causa duda of precupacion den comunidad relaciona cu datos, uzo y administracion di Aruba Health App.