Home Dutch Kingdom Agenda di investigacion 2022-2026 di CaribResearch pa e 6 teritorionan Caribense den Reino...

Agenda di investigacion 2022-2026 di CaribResearch pa e 6 teritorionan Caribense den Reino Hulandes.

SHARE

Na November 2021, CaribResearch a finalisa su Agenda 2022-2026 pa e 6 teritorionan Caribense di Reino Hulandes. E Agenda ta contene 16 prioridad de investigacion. Tur prioridad ta enfoca riba e tema central: “Re-imagina nos realidad: Fortalece nos capacidad pa maneha crisis”. E prioridadnan ta cubri 5 area de investigacion: 1) Historia, Construccion di Comunidad y Bienestar general (4 prioridad); (2) Gobernacion, Institucion y Integridad (3 prioridad); 3) Economia, Finanzas y Entrepreneurship (3 prioridad); 4) Educacion, Formacion escolar y Idioma (3 prioridad), y 5) Medio Ambiente, Tecnologia y Progreso (3 prioridad). 

E Agenda ta ofrece un bista profundo di e tema central y e aspectonan relaciona cu esaki. E aspectonan aki ta: ‘crisis’, ‘maneho de crisis’, ‘soberania’ y ‘resiliencia’. Alabes e Agenda ta describi e tipo di conocemento cu e investigacion mester produci y pa cua organizacion of instancia e conocemento mester ta relevante y na cua manera. Finalmente, e Agenda ta ofrece un elaboracion amplio di e 5 areanan di investigacion y ta analisa e prioridadnan di investigacion pa cada area: e motibo urgente di cada prioridad, cua conocemento ta urgentemente necesario pa cua organizacion y con e prioridad ta contribui na e tema central. 

 

CaribResearch ta un fundacion di investigacion no-gubernamental independiente estableci na Aruba na 2018 y ta registra na Camara di Comercio di Aruba. CaribResearch ta e prome y te awor e unico fundacion di investigación social cu ta representa e 6 territorionan Caribense den Reino Hulandes: Aruba, Corsou, Boneiro, St. Maarten, Saba y Statia. E miembronan di directiva di CaribResearch ta profesional academico local, cu experiencia di investigacion, maneho y gobernacion local. Nan tin tambe un profundo conocemento y comprension di cultura local, idioma, historia y realidadnan di e 6 territorionan. E Advisory Council di CaribResearch ta consisti di experto di investigacion di Aruba, Corsou, Puerto Rico, Hulanda y Estados Unidos di Merca.  

 

Na December 2021, CaribResearch a cuminsa manda su Agenda di Investigacion pa tur organizacion Gubernamental y No-Gubermental, universidad y institucion di investigacion den e 6 teritorionan Caribense di Reino Hulandes. Lo completa e proceso aki den e proximo simannan. Despues lo manda e Agenda tambe pa organismo internacional den region, Hulanda y demas país. Lo implementa e Agenda na 2 manera: den colaboracion cu otro organizacion y bou propio responsabilidad di CaribResearch. Pronto lo finalisa e Plan de implementacion y prepara pa ehecucion di esaki. Mas informacion tocante e proceso di implementacion di e Agenda di Investigacion 2022-2026 di CaribResearch ta sigui pronto. 

 

Atentamente, den nomber di CaribResearch, directiva diario,

Lydia Emerencia (Aruba/Boneiru)

Richenel Ansano (Corsou)

January 25, 2022