Home Corte Mucha di 16 aña cu a tene relacion cu un mucha muher...

Mucha di 16 aña cu a tene relacion cu un mucha muher di 12 aña declara liber

SHARE

ORANJESTAD – Awe mainta Hues di Corte di Husticia a declara e hoben B. di 18 aña liber di e acusacion di a abusa di un mucha muher di 12 aña, tempo cu B. tabatin 16 aña. E caso aki a sosode na 2019.

Aruba Native por a compronde cu algun siman pasa Fiscal a haya B. culpable y a exigi castigo combina. Awe mainta Hues a bisa cu ora ta trata di relacion entre dos mucha y e circumstancianan bou di cual esaki a sosode, no por papia di abuso.

Algun siman pasa tratamento di e caso aki a tuma lugar caminda Fiscal ta haya legalmente proba cu entre December 2018 y Juli 2019 cu B., e tempo ey e tabatin 16 aña,  a tene relacion sexual cu e mucha di 12 aña.

Pa cu e castigo, Fiscal a bisa cu e ta tene cuenta cu B. mes tabata menor di edad. Esaki ta haci e caso diferente pasobra e mucha tabatin 12 y B. 16. Fiscal a exigi castigo condicional di 1 luna di prison cu tempo di prueba di 2 aña. Fiscal a bisa cu esaki ta un aviso.

Awe mainta Hues a bisa cu no tin prueba cu B. lo a haci actonan inmoral cu un mucha bou 12 aña. Na opinion di Hues, si a keda proba cu B. a haci actonan inmoral cu mucha muher 12 aña y a tene relacion sexual cun’e. E tempo ey B. tabatin 16 aña.

Hues a mustra cu e muchanan a tene relacion sexual pa promer biaha. El a bisa cu mirando declaracion di B. y e mucha muher, e pregunta ta si e relacion sexual por wordo considera castigabel pa ley.

Hues a bisa cu ley penal tey pa proteha mucha jong entre 12 y 16 aña di integridad sexual. Pasobra nan no ta suficiente grandi pa pensa riba consecuencia.

Hues a mustra cu for di tratamento di e caso a sali na cla cu via social media na December 2018, e muchanan a conoce otro. Na Januari 2019, nan a topa otro y e mucha muher a bisa cu e tin 15 aña mescos cu B. Na Maart 2019, B. haci 16 aña y un luna despues nan a tene relacion sexual. Na opinion di Hues, aki ta trata di dos menor di edad cu tabata bayendo school y a gusta otro y kier tene relacion di sexual cu otro. Hues su decision ta cu no por considera e hechonan como actonan inmoral y a declara B. liber.