Home Politics Minister Ursell Arends: BAN TRAHA HUNTO PA NOS ADULTONAN MAYOR

Minister Ursell Arends: BAN TRAHA HUNTO PA NOS ADULTONAN MAYOR

SHARE

 

 

“Un pais rico no ta esun cu tin mas fondo pero si esun unda husticia social y respet ta prevalece”

 

Como Ministro encarga cu e cartera di Asuntonan di Adulto Mayor, Minister Ursell Arends ta incia su tarea cu un gran sentido di orguyo y speransa mirando e empeñonan cu ta ser haci den nos comunidad pa hisa e bienestar di nos adultonan mayor. 

 

“Mi ta felicita y alabes gradici tur instancia pa e inicitiavanan pa celebra riba 1 di oktober, Dia International di Adulto Mayor y na tur e profesionalnan cu ta compartiendo nan conocemento na bienestar di nos adultonan mayor”, Minister Arends a expresa. 

 

Nos comunidad a conoce hopi cambio den transcurso di tempo cu a sa di impacta e grupo aki. Minister Arends ta expresa su respet y compromiso grandi pa cu nos ciudadanonan adultonan mayor. “Mi ta aki nan hunto cu boso pa traha hunto pa un miho bienestar di nos adultonan mayor”.

 

Prome cu nos kier uni y traha hunto ta hopi importante pa como Pais fiha e vision riba kico nos ta considera bienestar di nos adultonan mayor y pa esey nos tin cu cuminsa wak envehecimiento den forma diferente. Te cu awor hopi biaha envehecimiento ta ser solamente considera den e luz negativo, esta cu e proceso normal di bida ta cambionan fisico, mental y gastonan riba fondonan di pensioen, e vergrijzing manera hopi biaha ta ser menciona. Esaki ta naturalmente realidadnan cu tur hende ta enfrenta. Pero na luga di keda pone e luz riba e realidadnan aki lo ta interesante pa pone e luz riba un envehecimiento cu ta focus riba stimula participacion, stimula salud, actividad y asina saca e maximo potencial di cada persona no obstante su edad. 

 

“Pues si mi tin cu imagina mi mes un Aruba cu tin e bienestar di nos adultonan mayor como prioridad, e lo ta un Aruba unda cu e adulto mayor hasta despues di yega su edad di pensioen ainda por participa den e comunidad den por ehemplo e sector laboral caminda e ta comprati su experiencia y conocemento na e generacion nobo, un Aruba cu ta cordial cu nos adulto mayor y ta duna nan preferencia no solamente pa razon di nan incapacidadnan pero como muestra di un respet halto. Un Aruba den cual e adulto mayor cu mester di mas cuido por haya esaki den un forma optimal y preferibel den su mesun ambiente di cerca. Un Aruba unda cu e adulto mayor ta participa activo den su propio cuido y cu su bos y opinion ta ser respeta. Un Aruba unda cu for di jong ta consciente cu envehecimiento ta un proceso natural pero cu por ser difini door di accionnan cu ta cuminsa di jong por ehempel un bida saludabel, un seguro, un plan di cuido den famia y trayectoria di salida di sector laboral y asina por nombra hopi mas cos”, Minister Ursell a enfatisa.

 

Pa nos logra esaki, Minister Ursell ta sigui bisa, “nos tin hopi reto nos dilanti, pero mas cu un tarea e ta nos responsabilidad. E ta exigi perseverancia, compromiso, boluntad y cooperacion. Pero tambe pa nos refleha riba e cosnan cu no ta cana optimal y atende cu nan den nan rais. Cu cada adulto mayor cu na e momento aki ta isola, ta biba den pobresa y no ta haya e cuido cu e merece, Aruba ta perde. Aruba ta perde na conocemento y sabiduria, na experiencia, na balor y normanan, na oportunidadnan, na nos identidad. 

 

Un pais fuerte ta un pais unda tur ta tene man hunto y sostene dignidad y humanidad pa cada un di su ciudadanonan. Un pais rico no ta esun cu tin mas fondo pero si esun unda husticia social y respet ta prevalece. Feliz Dia International di Adulto Mayor!”