Home International Desde cu Estados Unidos a sali for di Afganistan, e comunidad LGBT...

Desde cu Estados Unidos a sali for di Afganistan, e comunidad LGBT di Afganistan ta bibando cu hopi temor

SHARE

E comunidad LGBT na Afghanistan ta bibando cu hopi temor pa nan no wordo elimina, segun un homosexual” Mi bida awo a bira un nightmare.”

Pa mas cu 20 aña cu e Talibannan tabata for di poder, nan tabata wordo tolera, esnan na mando tabata bira cara  pa e comunidad Lgbt na Afganistan y asina stiekem nan por a expresa nan sentimentonan di amor. Pero awo cu e Talibannan a tuma e pais den nan gara, nan sentimentonan di amor un biaha mas mester wordo warda den un cashi na yabi. Es mas esun cu wordo atrapa cu un partner di e mesun sexo, ta core riesgo di wordo ehecuta.

E website Americano “Business Insider” a busca algun testigo di esaki na e sitio. Rameen: ” mi bida a bira un nightmare”

Homosexualidad na Afganistan ta oficialmente prohibi. Asina mes un soldat di Nacionnan Uni staciona na Kaboel, tur weekend, por a expresa su mes den un karaoke bar na Kaboel. Aki tabata caminda cu varios persona gay tabata topa otro scondi y segun Rameen e tabata sinti’e relativamente hopi sigur den e bar.  Rameen a sigui expresa:  “cu e tabata fantastico y mi a diberti masha hopi mes”

Awo Rameen tin hopi miedo di traha date cu su pareha, e la sigui bisa ” si e talibannan descubri nos, nan lo condena nos cu pena di morto. No ta keda nos nada otro di kibra nos relacion amoroso”

Un otro homosexual Ghulam, un studiante di 21 aña tambe ta den e mesun boto. E la bisa “mi no ta durf mas di sali pafo. Mi no ta mira un futuro pa mi na Afganistan y  si mi logra haya un visa, mi lo imigra mesora pa un pais.”

Sayed di 36 aña procedente di e provinica Balkh, cu ta keda na e parti nort di Afganistan, Sayed a mira con e situacion a decai den un siman di tempo. E la expresa su mes bisando cu “antes ami cu mi pareha sin berguensa por a topa otro, awo ya no ta asina mas. Manera cu nan sa cu bo ta gay sin pordon lo bo wordo mata.”

Den theoria ta para cu homosexualidad ta mara na castigo di morto. Pero desde fin di e prome regimen di Taliban na 2001, e practica cruel aki no tabata wordo ehecuta mas. Pero actualmente e ta na apunto di wordo cambia bek. Segun ‘Bild’  un hues di Sharia for di luna pasa caba a pone bon cla cu e lo laga mata e homosexualnan cu sota di piedra.

Nemat Sadat a traha pa un tempo basta largo como professor di sciencia politico na e universidad di Kaboel. Sadat ta e prome persona cu publicamente a sali na defensa di e comunidad LGBT y nan derechonan na Afganistan. Despues di varios menasa di morto, na 2013 e mester a bandona Afganistan y a huy bay biba na Merca.

Awo Sadat ta pidi e comunidad internacional pa tuma action hopi lihe, segun su persona a bisa ” ora mi bisa cu lo bin un matanza di homosexual, mi no ta exagera”. Segun Sadat un tras di otro e ta hayando mensahe for di hopi persona segun su persona nan ta  mandando copia di nan paspoort y ta rogando su persona pa yudanan sali for di Afganistan.

Hamir Zaher (47) tabata un di e prome hombernan di Afganistan cu a durf di sali out of the closet. Na 2001 e la bandona su pais natal. El a biba 7 aña Turkia y despues a haya asilo na Canada. E la expresa su mes bisando ” Maske cu nos gobierno a haya apoyo di Estados Unidos, toch e no tabata facil pa ta gay na Afganistan. E comunidad gay semper y cuando a keda core riesgo di por ehempel di wordo maltrata of di wordo encarcela. Pero awo e cos cu mas por sperabo ta bo morto.”

Najib Faizi di 21 aña ta yama su mes e prome dragqueen procedente di Afganistan. Na edad di 10 aña e la imigra hunto cu su ruman muher grandi, nan a bay biba na Alemania, e palabranan di Najib ” aki mi por haci lo ke mi kier, pero e libertad mi no ta haye di mes.”

Door di su activismo y su presencia jamativo riba medionan social, varios biaha e la wordo menasa cu morto. Segun su persona siman pasa e ha haya varios gritonan di desesperacion di hendenan cu ta spera un dia di biba sin preocupacion. “E hendenan aki segun su persona mester di ayudo, pero tur hende ta lagandonan na caya.”

Te na e momentonan aki e unico exepcion ta por lo pronto Canada. Canada ta e unico pais cu ta willing pa ricibi 20 mil imigrante for di Afganistan, cu un focus special riba gruponan den minoria. Banda di mas activistanan femenino tin tambe miembronan di e comunidad LGBTQ cu ta mas cu bon bini.