E efectividad di e vacunanan Pfizer y Moderna contra e contagio di Covid-19 a baha di 91 porciento pa 66 porciento, esaki desde cu e variante delta ta dominando e contagionan di Covid-19 na Estados Unidos. E datosnan aki a wordo publica diamars pa e autoridad di salubridad Mericano.
Autor di estudionan haci na Merca ta sigui bisa cu ta hopi importante pa vacuna, e vacuna ta keda toch e tool mas importante y bentahoso contra e contagio di COVID-19.
E datosnan aki ta procedente di un investigacion haci bou di miles y miles di personanan/professionalsnan trahando den e ramo di salubridad y tambe den hospitalnan. E estudio aki a wordo haci den 6 estado pa asina investiga e eficiencia di e vacunanan aki bou circumstancianan real. E participantenan tabata wordo getest semanalmente riba infecionnan sintomatico y asintomatico.
Entre december 2020 y april 2021, e efectividad di e vacunanan pa preveni e infecionnan tabata na 91 porciento, esaki segun datosnan di Center for Disease Control and Prevention (CDC), pero desde cu e Variante Delta a cuminsa domina e contagionan na Merca, e eficiencia di e vacunanan aki a baha te na 66 porciento.
E autornan di e estudio haci, a avisa cu e eficiencia di e vacunanan aki a bay atras, pero no solamente door di e variante Delta, pero tambe cu e efectividad di e vacunanan cu tempo ta baha un poco. “Maske cu e datosnan aki ta mustra cu e eficiencia di e vacunanan a baha un poco, asina mes e vacunanan ta keda preveni y domina e infecionnan cu dos tercera parti, dus e ta di sumo importancia y bentahoso pa vacuna”, asina e expertonan, e autornan di e investigacion a publica.
E datosnan cu a keda publica Diamars, no ta haci distincion entre e efectividad di e dos vacunanan Moderna y Pfizer.
E variante Delta di Covid-19, ta dominando Estados Unidos desde juli, e variante aki ta responsabel pa 98 porciento di e contagio di Corona na Estados Unidos.