Home Corte Na November Corte Superior lo trata caso asesinato di un Chines na...

Na November Corte Superior lo trata caso asesinato di un Chines na Jaburibari

SHARE

ORANJESTAD – Hof di Corte Superior a dicidi cu na November 2021 lo bay trata e apelacion di e homber Michael Gibson, kende a wordo haya culpable di asesinato. Na October 2019, Hues a condena Gibson na 15 aña di prison pa asesinato di e Chines H.Quach den un apartamento na Jaburibari.

SCUCHA TESTIGO NA CANADA

Aruba Native por a compronde cu recien, via video conference Hof a atende e di dos caso pro forma di Gibson. Na Augustus 2020 tabatin un caso pro forma caminda abogado mr. Arendz Marchena a mustra cu a haci peticion pa scucha un testigo na Canada pero cu ainda esey no a sosode. Esey tabata e motibo cu a caso tabata pro forma. A pospone e caso pendiente e interogacion aki. Den e di dos caso pro forma e luna aki, Hof a bisa cu na November 2021 lo trata e caso.

15 AÑA PA ASESINATO

Na October 2019, Hues, den su sentencia, a bisa cu e ta haya legalmente proba cu Gibson riba 1 Mei 2017 a asesina e Chines H.Quach y tabatin un arma den su poder.

Hues a tuma Gibson na malo pa e forma con a tira mata e Chines, cu ta un forma serio di asesinato. E asesinato aki a sacudi henter comunidad. Hues a bisa cu e ta sigui Fiscal su exigencia y a condena Gibson na 15 aña di prison, kitando e tempo cu e ta sera den KIA.