E criminal mas grandi di Hulanda Ridouan Taghi ta lider di e organizacion criminal Mocro Maffia. Ridouan actualmente ta tras di tralie, pa un serie di likidacion, traficacion di droga na gran escala etc.
Na december 2019 Taghi a keda deteni den un villa na Dubai. E la wordo extradita pa Hulanda caminda cu e ta actualmente cera, e ta e sospechoso principal den e caso hudicial grandi yama Marengo-Proces.
Amsterdam, Hulanda:
Recientemente a sali den noticia, cu Husticia Hulandes ta teme y ta sospecha cu un grupo di criminalnan grandi, lo trata na haci un intento sigur violento pa mira si nan lo por libera Ridouan Taghi for di e prison caminda e ta preso actualmente.
E informaciona a yega na autoridad, cu Taghi lo tin un pot cu ta consisti di un cantidad di miyones di Euro, pa cu su liberacion for di prison. E informacion aki a sali na cla despues di un declaracion di e comision di apelacion di e Raad voor de Strafrechtstoepassing en Jeugdbescherming (RSJ), cu tin e tarea di supervisa e ehecucionnan di castigonan.
Un sobrino of primo di Ridouan Taghi actualmente lo ta buscando un grupo di personanan den baho mundo, delicuentenan pisa pa ehecuta e liberacion di Ridouan.
Segun autoridad, banda di e pot cu miyones di Euro pa libera Taghi, tin un posibel segundo plan. Autoridad cu ta wordo bon teni na cuenta cu ne, e segundo plan lo por ta cu e grupo di criminalnan aki lo trata na secuestra un diplomatico sea Africano of Hulandes y lo pidi acambio libertad di Taghi. E opsporingsdienstnan Hulandes ta considera e plan aki uno hopi realistico.
Tin hopi storianan espectacular y rumornan cu ta circula rond di e topcriminal aki, pero te na e momento nan aki no tin mucho prueba. Un di e rumornan aki ta, cu Taghi tempo cu e tabata fugitivo, e lo tabata tin un link cu Iran, pero esaki a resulta di no ta e caso. Casi tur atentado, atake etc. hopi lihe ta wordo gelink actualmente cu Ridouan Taghi. Segun su abogado no tin prueba palpabel cu ta relaciona su cliente cu e asesinato di e abogado Derk Wiersum y tampoco no tin prueba cu Taghi tin di haber cu e morto di e ruman di e testigo principal den e Caso Marengo.
Segun su abogado Inez Weski Ridouan no tin nada di haber cu e intento di asesinato di e journalista Peter R. De Vries. Tambe e la bisa cu su cliente no tin nada di haber cu e lista di nombernan di personanan cu nan bida ta coriendo peliger di wordo mata. Ainda no ta conoci si Taghi despues toch lo wordo acusa di e likidacion di e abogado di e testigo principal Nabil B. y ruman di Nabil B.
Taghi ta wordo sospecha den e Marengo-proces, di un serie di likidacion pa Mocro Maffia y e intentonan di likidacion. Pa hopi tempo e tabata e persona mas busca di hulanda, e la wordo getrace y deteni. E buskeda di Taghi a wordo acelera ora cu Marocco a interferi den e buskeda pa Taghi, esaki despues di e likidacion na Marrakech. Taghi e momento ey a cuminsa sinti cu e no por move rond mas. Segun un hefe di polis na Dubai, ta for di 2016 Taghi tabata scondi den un villa, cu cortina cera. Su man drechi Saïd R. a wordo getrace na Medellin, Colombia. Autoridad a duna permiso caba pa extradita Saïd pa Hulanda.
Taghi y Saïd R. banda di ta duna ordo pa asesina y intento di asesinato, nan ta wordo sospecha tambe di ta na cabes di un organizacion criminal grandi cu ta dedica den traficacion di droga riba gran escala.
E sospecho ta bay entre otro riba e asesinato di Martin Kok, un ex criminal, cu despues di e ultimo biaha cu e la sali for di prison, a trata na drecha su bida y a cuminsa cu Vlinderscrime.nl, un website den cual e tabata publica casonan di crimen, den baho mundo y e tabata pone tur informacion di e criminalnan y hopi biaha te hasta nan potret. Esaki tabata trece Kok constantemente den problema cu e organisacionnan criminal y e delicuentenan. Na December 2015 Martin Kok a wordo likida dilanti di un Sexclub na Laren. Mayoria di prueba haya ta indica cu Ridouan tin algo di haber cu e asesinato aki, e pruebanan a wordo intercepta for di messagenan den pgp celular confisca y for di e declaracionnan haci pa e testigo principal Nabil B.