Mientras lider di MAS Sra. Marisol Lopez Tromp, kemen cu problema interno ta keda interno y cu nada no a pasa ainda, alcontrario candidato number #2 Aquanette Gunn riba facebook ta saca un video y un post den cual e ta bisando cu “UN PROTOCOL NO TIN VALIDEZ MAS SI UN PERSONA HACI MAL UZO DI DJE”, esaki e ta referi na su colega candidato Solangel Dinmohamed Lacle.
Despues cu Gobernador a nombra dos informado, nan a invita e lidernan di e 5 partidonan cu den elecion a haya asiento, esaki ta pa informa Gobernador di e posibilidadnan pa forma un Gobierno. Dialuna a toca turno na e 3 partidonan chikito.
Sra Marisol Lopez Tromp despues di a sali for di e bishita aki, a splica cu e la wordo invita y e tema tabata Informatie opdracht, e contenido di e reunion ta confidencial. Marisol Lopez Tromp, a splica cu den e reunion aki e informadonan a hacie varios pregunta, pa motibo cu nan ta sondeando e posibilidadnan pa forma un posibel gobierno, cu un base mas amplio.
Segun Lider di MAS, nan no tin niun palabracion cu niun partido. Enberdad cu despues di elecion e la sinta cu lider di Accion21, pero tabata mas pa conoce otro y e ta contento di por a conoce y papia cu Sr. Mansur. Segun Marisol mirando e panorama actual, e gobierno nobo lo tin desicionnan cu mester wordo tuma, leynan pa pasa cu ta rekeri aprobacion di minimo 14 parlamentario, cual ta un base mas amplio. Si kier baya ehecuta reformanan cu ta pone den e uitvoeringsagenda pa cada Ministerio, mester tin un base mas amplio pa sostene e reformanan aki. Gobierno por forma cu 11 pero pa e leynan cu ta rekeri 14 asiento lo keda depende si e ley lo haya aprobacion di otro parlamentarionan cu no ta forma parti di Gobierno. Segun su persona, mirando e retonan grandi e informadonan ta sondiando e posibilidad pa forma un gobierno cu un base mas amplio.
Den programa di MAS ta poni combatimento di corupcion, cual sigur nan ta para hopi fuerte cu esaki. si nan logra forma parti di e Gobierno nobo sigur Combati Corupcion lo ta un prioridad y si no drenta gobierno, den parlamento nan lo keda bati riba e topico aki.
Tambe Bienestar di nos hendenan, tin hopi cos pa regla riba e tereno di Salud y educacion.
Marisol no kier a bay mucho riba e problemanan interno cu tin den partido MAS, su contesta su un smile riba su cara tabata ” Problema interno ta keda interno” y ” Nada No a pasa ainda” esaki referi na e protocol, e afspraaknan haci internamente den e partido, cu e candidato cu mas firma lo bay parlamento.
Su persona a sigui bisa cu e proceso interno mester tuma lugar, pa mira e aceptacion di e asiento di cada politico.
E la referi na e lista di Parlamentarionan nobo cu a sali publica, e la sigui bisa cu algun di nan lo ta parlamentario transitorio y cu asina gobierno keda forma nan lo mester schuif pa bay forma parti di Gobierno y parlamentarionan nobo lo drenta. Segun su persona, Parlamento no por warda, paso tin hopi trabou y leynan pa wordo trata.