Home » Segun Mike Eman, “Censo tabata bisa pa descualifica votonan di AVP y cualifica di otronan y sigur e esunnan di MEP”

Segun Mike Eman, “Censo tabata bisa pa descualifica votonan di AVP y cualifica di otronan y sigur e esunnan di MEP”

by Admin
0 comment 119 views

Oranjestad – Den oranan di merdia despues cu Conseho Electoral di  Aruba a duna di conoce cu lo no bay tin ningun cambio mas den e resultado di eleccion 2021 y cu no lo bay tin ningun reconteo mas, manera di por a spera caba, partido AVP a activa.

Esaki a causa un avalancha di reaccion di parti di e representantenan di e partido berde, cu ta esun cu a inicia cu e proceso pa pidi reconteo di votonan.

E dianan anterior tabata wordo pidi pa pasa firma na Cas di Partido, pa asina nan por a bay cu esakinan Censo diaranson mainta. Un cantidad di 3 mil firma a wordo recauda y hiba cu un carta diaranson na Censo.
Eynan Sr. Thode di Conseho Supremo Electoral, a informa nan  cu no lo ta bay tin ningun reconteo mas,  esaki no a cay den bon tera cerca e partido AVP.

For di e momento ey, nan a cuminsa cu un avalancha di insinuacionnan un biaha mas.
Segun Sr. Henny Eman (ex Prome Minister) ” e partido a wordo horta di voto y cu ta cos di ladron”. Esaki tabata palabranan di  Sr. Henny Eman(ex prome minister) kende tabata para na pia di e trapi unda e reunion tabata tumando luga.

Algun rato despues Sr. Mike Eman cu ta lider di partido di AVP a sali afo y duna su pensamento.

Segun Mike Eman, ” ta Sra. Wever Croes lo ta esun cu a duna Electorale Raad di Aruba ordo pa seal e cos aki y kima e stembiljetnan”. Pa locual su persona lo kemen ta fraude electoral.

Eman den un forma hopi rabia a sigui comenta: “Si e resultado di awe a sali for di un black box(electronico) manera Sharin tawata kier, manera Evelyn tawata kier y manera Glenn tawata kier, tur e 3 mil hendenan desapunta cu a bin ayera na cas di partido pa firma, awe lo tawata para den un di e edificionan di gobierno cu cualkier consecuencia cu nos no tawata kier”.
Cu esaki Mike Eman kemen cu lo tabata tin disturbionan den Oranjestad. Sr. Eman den un entrevista diamars ultimo a bisa caba algo similar asina.

Ponencianan manera esaki no ta bon, debi cu un bon lider politico mester sa di controla su siguidornan, tene nan calmo y no crea scenarionan hostil asina, eleccion 2021 a pasa caba. Pero Sr. Eman ta escoge un biaha mas, mescos cu ayera di papia ariba si cos a bay diferente o sea si a usa votacion electronico y cu e resulta actual,  lo tawata tin su consecuencia serio, pasobra ta esey ta locual Sr. Eman kemen, solamente pinta un poco bunita.

Den e mesun rosea Eman ta bisa cu awe cu bo por midi’e y wak e ainda tin desconfiansa, pues kiko Eman kier ?

Pa finalisa Mike Eman a bisa tambe cu for di e dia anochi(diabierna 25 2021) “nan” ta bisa cu for di e Hoofdstembureau/ Censo tawata bisa pa descualifica esunnan di AVP y cualifica di otro partidonan y sigur esunnan di MEP.

Nos ta spera cu e capitulo aki a wordo cera awe, mester respeta democracia y mester tin confiansa den nos institutonan. Aruba ta un pais democratico y civiliza, nos a celebra democracia diabierna ultimo, ban keda cabes friu y duna espacio na Gobernador, na e informado, na e formador y tur e partidonan politico cu a haya asiento, pa nan por yega na otro y forma un gobierno nobo na bienestar di Aruba y no sigui cu tanto polemica cu no ta necesario.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio