Prome Minister a manda un felicitacion pa tur e otro partidonan cu a logra saca asiento, tambe manera el bisa na mas di un ocasion, e ta habri pa traha cu tur e partidonan aki.
Mep ta mirando cada un di e partidonan nan programanan, pa mira con por alinea nan programanan cu esun di MEP y tambe pa mira unda nan ta desvia mas di otro. Lider di MEP a splica cu haciendo esaki nan por tin un miho bista cua di e partidonan ta mas compatibel cu e vision di partido MEP.
MEP ta wardando Gobernador apunta un Informado pa papia cu e partidonan, e Informado lo informa nos si e partidonan aki tin interes pa traha cu MEP. MEP no a tende di tur si nan ta dispuesto pa traha cu MEP.
Un conseho cu lider di Mep a duna ta, ” pa den e temponan aki no tira lodo riba otro, paso esey no ta bon, cada partido mester carga su responsabilidad. Pueblo a dunabo asiento y a pidibo pa representanan den parlamento y cu e oportunidad pa representanan den gobierno tambe. Tira lodo riba otro no ta bon na e momentonan aki, nos mester keda cabes frieu.”
Hopi biaha bo ta tende pa kiko partido MEP mester bay den Gobierno e resultado di Elecion ta cla y raspa. Pueblo a bisa cu e ta aproba e maneho di partido MEP den Gobierno, door cu MEP a mantene su forsa. Pueblo ta bisa cu nan ta aproba e maneho cu Minister President a hiba door di a redobla su votonan, liderando e gobierno aki. NO mas pueblo a bisa SI busca otro partners den coalicion pa nos por bay den e siguiente etapa di gobiernacion. Lo laga Gobernador su proceso cana pasobra MEP ta respeta e instituto aki y basa ariba esey nos lo tuma e siguiente paso.
NO tabata tin niun acercamento di otro partido na MEP. Mep no kier stroba e proceso, e no ta na su lugar, cu nos tin un proceso constitucional, nos constitucion ta bisa con e proceso mester cana, y nos ta respeta e proceso aki tambe. E momento pa bay acerca otro lo yega, pero mester sa prome cua partido ta dispuesto pa traha cu MEP.
Prome Minister ta pidi tur hende pa keda trankilo y keda cabes frieu. Aruba a caba di sali for di un campanja electoral hopi cortico y hopi intenso.
Sra Evelyn Wever Croes ta complimenta e pueblo di Aruba pa e forma cu e campanja electoral a bay, segun su persona e la bay riba un nivel netjes, caminda nos por a debati riba contenido mas tanto.
Nos mester keda trankil, no mester bay den panico, nos no mester ansha. Awe e resultado a wordo estableci finalmente y awo ta cuminsa un caminda pa e parlamento nobo 2021. Mientras tanto e proceso pa formacion di un gobierno nobo ta sigui tuma luga. E ta pidi e pueblo pa keda trankil paso e formacion di gobierno ta den man di hendenan capacita, hendenan cu ta busca un solucion pa Aruba.
Na final e mensahe di nos Minister President pa Aruba ta “laga nos tur keda trankil y enfoca riba e recuperacion di Aruba.”