Willemstad – Gobierno nobo di Corsou ta para dilanti di un gran reto pa loke ta trata e presupuesto (di mas aña). Asina Colegio di supervision financiero di Corsou y Sint Maarten (Cft) a indica den combersacionnan reciente cu, entre otro, Ministro di Finansa. Corsou lo mester elabora y ehecuta un plan pa reduci e deficitnan presupuestario di mas aña gradualmente. Banda di esey ta urgente pa implementa cambio y economisacion den cuido y den seguridad social pa garantisa sostenibilidad y pagabilidad di e sistema social tambe pa e futuro generacionnan.
E presupuesto aproba pa e aña aki a perde actualidad y lo mester bay ahust’e. Cft a haci diferente recomendacion al respecto. E recomendacionnan ta inclui, entre otro, implementacion di reforma den e sistema fiscal, destina pa realisa simplificacion, crecemento economico y control di gasto, como tambe un distribucion mas uniforme di entrada. Banda di esey a haci recomendacion dirigi riba implementacion di mehoracion structural den e ciclo presupuestario y di hustificacion, maneho financiero y interpretacion di propiedad di accion responsabel di e entidadnan publico.
Recuperacion despues di pandemia
Corsou tin di haber cu un recesion economico di hopi aña, embehecemento di e poblacion y e pandemia di coronavirus a dal e pais duro. Na mes momento e pais tin un gran potencial pa desaroyo economico. Particularmente den e sector di hospitalidad y turismo por logra hopi a corto plaso. Na e momentonan aki Corsou tin un bentaha riba e destinacionnan competente. Den e proximo añanan ta di gran importancia pa Gobierno tin finansa publico na ordo y pa economia di Corsou cuminsa crece. Al respecto reforma economico, reforma fiscal y control di gasto lo ta crucial.
Na medida cu economia recupera suficientemente, mas pronto posibel lo mester reduci gradualmente e dependencia di e empresanan di e medidanan di sosten manera NOW y e compensacion den e gastonan fiho. Consecuentemente por reduci tambe e deficit presupuestario di 2021. Cu ehecucion corecto di e Areglo di Pensioen Anticipa Boluntario (VVU) e aparato gubernamental por bira mas eficiente y ademas ofrece oportunidad na un generacion mas hoben pa un carera nobo. Corsou por realisa un aceleracion den e proceso aki en comparacion cu otro pais Caribense ehecutando e medidanan y reformanan inclui den e pakete nacional (landspakket).
Economisacion den cuido
Seguridad social y cuido ta forma un parti importante di finansa publico. E fondonan social ta confronta deficit financiero structural, cu cada bes ta bay eherce mas presion riba e presupuesto nacional. Ta coresponde e gobierno nobo pa tuma decision encuanto e reformanan y aplica nan a corto plaso. Sin e reformanan ey, seguridad social y cuido lo no ta sostenibel. Un ehempel ta e transicion pa remedi generico cu e mesun efecto cu esunnan di marca, cu cual lo por realisa un economisacion di ANG 40 pa 50 miyon a corto plaso.
Pa e di tres kwartaal Hulanda a compromete su mes condicionalmente cu ANG 168 miyon di sosten di likides. E sosten aki ta necesario pa por absorba e ultimo efectonan di e crisis di pandemia. Pa no sufri tardansa innecesario y hustamente acelera e recuperacion economico, Corsou mester tuma mas pronto posibel un decision tocante e condicionnan stipula pa Hulanda. Recuperacion economico ta cuminsa awor y lo mester conduci na un reduccion rapido di e posicion di debe acumula.
Di 28 te cu 30 di juni Cft a haci un bishita na Corsou y a hiba combersacion cu Gobernador, Ministro di Finansa, Conseho di Ministro, Banco Central di Corsou y Sint Maarten (CBCS), Stichting Overheidsaccountantsbureau (SOAB) y Conseho Social Economico (SER). Prome cu e biahe di Colegio Presidente di Cft Raymond Gradus a tene un charla tocante e situacion financiero-economico di Corsou prome y despues di e crisis di pandemia y tocante e supervision financiero. Por haya e charla aki na e website di Cft: www.cft.cw.