Oranjestad: For di Diadomingo anochi por a mira un cantidad di persona presente na Cas di Partido, posiblemente aki ta caminda a cuminsa planea pa bay pidi un reconteo, mirando cu AVP den e ultimo elecion a bay drasticamente atras den voto.
Tur cos ta mustra cu e representantenan di e partido berde no ta satisfecho cu e resultado di elecion y cueste loke cueste kier ta parti di e Gobierno nobo. AVP, un partido di 13 asiento, na 2017 a baha na 9 asiento y awo a baha te na 7 asiento.
Varios calculacionnan a wordo haci y segun e representantenan di partido berde nan falta solamente 53 voto pa yega na un asiento, cu lo wordo kita for di un di e otro partidonan. Esaki nos no sa for di cua partido e lo por wordo kita. Si esaki yega na sosode sigur no lo cay den bon tera cerca e partido cu lo perde su asiento y cu tur consecuencianan cu e acto aki lo por trece cu ne. Diaranson Electorale Raad lo bay tuma un desicion encuanto si ta haci reconteo of No.
Di otro banda nos a compronde, pero no por a confirma cu tabata tin acercamento caba entre AVP, Accion21 y MAS, pero mirando e resultado di e elecion aki e tres partidonan aki nan so no por forma un gobierno nobo, nan lo tin mester di e asientonan di Raiz pa por forma un gobierno.