Cu indignacion Comision “Ken ta Betico” a tuma nota di un declaracion di e periodista sra. Sharina Henriquez kende den un tono sumamente repugnante a trece dilanti cu “Betico Croes den su tempo tambe a haci actonan di corupcion”. Cu e expresion baho y vil aki a keda demostra un biaha mas cu sra. Henriquez ta carece di conocemento di historia politico di nos pais y en especial pa loke ta regarda e bida y lucha di un gran Arubiano, nos Libertador Betico Croes.
E frasenan denigrante expresa door di e periodista aki tambe a ser ventila den añanan 80 door di exponentenan di partido AVP. E tempo ey nos tur por corda cierto expresionnan haci pa AVP pa trece duda den integridad di Betico Croes, manera entre otro cu 1. Betico Croes lo a malversa 340 miyon florin, 2. Betico Croes ta doño di fabrica di chuculati Savoy na Venezuela, 3. Betico Croes ta doño di condominio na Miami y un gran cantidad di mentira mas.
Pa loke ta e declaracion di 340 miyon florin di malversacion, ex Prome Minister Henny Eman a declara esaki tambe den Algemeen Dagblad na Hulanda dia 15 januari 1986, den e periodo cu Betico Croes tabata luchando pa su bida ya cu e tabata den coma: “ARUBA: SUPERFRAUDE. 700 miljoen verduisterd door Croes, zegt premier Eman”. Un acusacion sumamente grave y pa cual e tempo ey sr. Nelson Oduber a hiba Henny Eman pa Corte y cu hues a bati malamente riba dede di sr. Eman y cu e mester a rectifica e mentira bergonsoso aki. Talbes sra. Henriquez den su ignorancia no a yega di tende di e rectificacion aki. Ta p’esey adhunto un prueba di tal rectificacion.
Tur e otro acusacionnan di partido AVP e tempo ey tampoco tabata basa riba berdad. Tur hende a conoce Betico Croes como un homber humilde, a biba humilde, no a mishi cu fondonan publico y a muri tambe den tur humildad.
Comision “Ken ta Betico” ta condena e expresionnan di sra. Henriquez y ta spera toch cu e lo tin e grandesa pa pidi su disculpa y corigi su expresionnan haci cu a causa dolor innecesario den seno di e familiarnan di nos gran Libertador, su partido cu el a funda y di nos Comision.
