Oranjestad, Aruba – Desde e inicio di Big League e organisadornan a priminti e hungadornan un experiencia unico y di nivel. Danki na nos patrocinadornan y e esfuerso di tur voluntario cu ta traha incansabel pa laga nos muchanan “play the game they love” durante e ultimo siman nan.
Comishon di Big League ta anuncia e wega di streanan local (all-star) y batidornan di poder (homerun derby) cu lo tuma lugar diasabra dia 29 di mei na veld di NCCA cumindando pa 5or. Cada team lo consisti di 17 hungador, a selecta e hungadornan cu un minimo di 15 biaha na plato (PA) cu e mihor averahe di bateo (AVG), ademas a selecta 8 di e mihor pitchernan di cual 4 a bai pa cada team. E managernan di e dos teamnan lo ta Clyde Roga y Eldwin Geerman, managernan di e teamnan cu a keda na prome y di dos lugar despues di round robin 1 y 2.
Cada team a manda aden nan “power hitters” pa competi den e homerun derby y siguramente lo ta un anochi inolvidabel pa tur presente.
E vision di Aruba Little League pa lanta bek e categoria Big League pa ofrese e oportunidad pa hungadornan di edad 16 – 19 aña sigui desaroya y crese den e deporte a bira un realidad. Ta traha tur dia cu e meta principal aki den mente y pa sigui engrandese baseball na Aruba, hungadornan por sigui carga e amor y disciplina pa e deporte.
Photo credits: 297Sports, Sports Zone Aruba
