Home Police Durante un control a bin topa cu un persona cu polis tabata...

Durante un control a bin topa cu un persona cu polis tabata buscando for di weekend

SHARE

Tres Trapi, Malmok:
Diahuebs algo despues di 10’or di mainta, polis di strand a bin topa cu un auto sospechoso para na Tres Trapi, mesora a bay controla e auto aki, un Chevrolet Celta cora, numera A69578.

Pa casualidad e mesun auto aki tabata wordo busca for di den weekend largo caba. Esaki pa motibo cu e la agredi y menasa un security guard na Alhambra Casino. Prome cu polis a yega e la bandona e sitio den su Chevrolet Celta cora, pero testigonan a nota e number di auto y a avisa polis. Mesora polis a cuminsa cu un buskeda pa e auto aki, pero sin resultado.

Riba e mesun dia aki, den oranan di anochi na altura di Citgo Oranjestad, presencia di polis a wordo pidi pa un accidente. Na yegada polis nan a bin compronde cu ta trata atrobe di e mesun homber di e Celta, e lo a pasa auto riba pia di un homber y cu e mesun Celta cora a primi e homber contra un otro auto staciona. Na yegada di polis atrobe e homber den e Celta a bandona e sitio. Polis un biaha mas a cuminsa un buskeda pero atrobe sin resultado.

Te cu diahuebs mainta cu nan a bin topa cu e auto sospechoso aki na Tres Trapi y ora a controla e plaachi number a resulta cu ta trata di e Chevrolet Celta y homber cu tabata wordo busca for di weekend.

E homber a keda deteni y tranporta pa warda di polis, caminda e lo mester bay duna cuenta di su actonan violento durante weekend pasa.