Mirando cu dia 18 maart 2021 nos lo recorda cu 45 aña pasa nos a inaugura den un Wilhelmina Stadion completamente yen di hende nos himno y bandera ta mi obligacion moral pa pone un parti chikito di e historia den su contexto.
Mi tabata diputado di e.o. Cultura, unda mi a ser acerca door di Betico Croes dfm, cu den cuadro di su vision pa uni nos pueblo lo ta bon pa nos gobierno insular (Bestuurscollege) nombra dos comision pa bin cu proposicionnan pa nos isla tin su propio himno y bandera, pa bay Eilandsraad cu ne pa ser aproba. Nos a nombra y instala 2 comision: un pa nos himno y un pa nos bandera. E miho manera pa haci esaki tabata ta den consulta y participacion di nos pueblo. Envolvi e pueblo y laga nan bin cu sugerencianan.
Aprobacion di nos Himno y Bandera
E himno no tabata dificil, pasobra pa basta aña caba tabata tin un composicion di Padu Lampe y Rufo Wever ambos dfm. cu tabata ser usa caba. A bin acerca un couplet di Lio Booi dfm. Esaki a ser presenta na Bestuurscollege pa e comision cu a ser acepta y manda Eilandsraad.
E comision pa yega na un bandera a haya sosten di e Instituto pa diseño di bandera di professor Whitney Smith di e International Flag Institute of Boston cu a manda su experto Sarah Bollinger pa asisti e comision cu a usa tur e ideanan cu a bin for di nos pueblo y al final a presenta e diseño y splicacion na Bestuurscollege cu a acepta esaki y mand’e Eilandsraad.
Dia 16 di maart 1976 mi mester a bay defende como diputado e dos proposicionnan den Conseho Insular cu tur e discusionnan ariba e colornan di bandera y e fecha 18 di maart y pakico dicho fecha. Lo mi spaar bo e discusionnan aki. Al final tabata e miembronan di fraccion di MEP so a aproba e himno y bandera y e fecha. Un miembro so di oposicion a vota pa e himno, pero contra e bandera. Como 18 di maart no tabata un fecha regla pa ley nos gobierno mester a entrega e fecha di 15 di december (Statuut dag) y desde e fecha ey nos a declara 18 di maart como nos “Dia Nacional” cu ta un dia oficial liber pa pueblo y a bira un fecha pa tur aña conmemora cu e dia ey tambe nos a inaugura nos himno y bandera. Lo mi spaar bo e echo historico cu tin partido desde 18 di maart 1948 nunca mas te na 1976 a celebra e fecha aki, pero historia si bo busca pa sa lo bisa bo pakico!
Pakico un himno y bandera?
E motibo primordial di Betico Croes dfm. pa bin cu e vision pa un propio himno/ bandera tabata pa uni e pueblo y cu nos por mira den himno y bandera nos simbolonan di union y libertad. E kier a caba cu desunion bou di nos pueblo. Betico kier a caba tambe cu division/ segregacion bou di nos pueblo, unda tabatin partido politico cu tabata pone hende ariba lista pa representa grupo di hendenan cu a bin di un otro isla of Hulanda. E tempo ey nos Bestuurscollege a nombra tambe un comision pa bin cu nos propio ortografia pa nos Papiamento. Mescos nos a organisa tambe pa sa kico pueblo kier como su futuro estatal un referendum consultativo dia 25 maart 1977, e promer referendum den historia di Reino Hulandes ya cu legalmente nos Staatsregeling/Eilandenregeling ni Statuut tabata conoce legalmente e instituto aki.
Awe 45 aña despues, danki Betico dfm. pa bo vision, partido MEP y un y tur cu tabata parti di nos historia di e formacion y duna contenido politico/cultural/folklorico na nos pais Aruba. Mi ta gradici MEP di por tabata nan diputado cu por a haci e trabou como gobernante y mi coleganan den Conseho Insular. Pueblo pabien cu 45 aña di nos promer celebracion pa por a inaugura nos himno/bandera dia 18 di maart 1976. Pabien tambe cu nos “Dia Nacional”.
Un momento di reflexion
Un bon momento pa reflexiona ariba nos relacion cu Hulanda y si nos democracia y nos institutonan ta funciona na un manera debido, na un forma organiza y ordena pa sigui brinda nos e libertad, e union cu Betico Croes dfm. a desea pa su pueblo. Puntra bo mes kico abo ta haci tur dia pa salvaguardia, proteha y conserva nos pida diamante cu nos a logra dia 1 di januari 1986. Stop di critica pa trata na distrui. Bula bo mes aden y cuminsa asumi responsabilidad pa bo hechonan. Puntra bo mes como Arubiano y tur cu a bin biba aki y cu a integra bou di nos pueblo, con abo ta yudando bo pais y cu kico abo ta contribuyendo tur dia cu bo labor y dedicacion pa hiba e pais aki dilanti y hibele, unda abo tambe kier mir’e bay y yega! Mas importante ta reflexiona unda nos ta, unda nos kier bay y kico abo ta dispuesto pa haci pa por yega ey nan. Historia hamas por lubida esnan cu si a sacrifica pa locual nos tin awe. Danki pa boso contribucion, e lucha hiba y e sacrificionan haci. Celebra den grandi nos “Dia Nacional” y 45 aña di nos inauguracion di e celebracion di nos himno y bandera.
Pabien pueblo y danki pa e apoyo y sosten.
