“Aworaki ta momento pa cuminsa pensa riba recuperacion di nos Pais”
Dialuna 15 di maart, na Centro Libertador Betico Croes na Santa Cruz, Prome Minister Evelyn Wever-Croes hunto cu coleganan Minister di Salubridad, Dangui Oduber y Minister di Finansa Xiomara Maduro, a ricibi e di dos shot di e vacuna di Covid-19. Mirando e importancia pa pone pais Aruba economicamente bek riba pia y pa proteccion di nos grandinan, e mandatarionan a tuma e prome shot di e vacuna dia 22 di februari. Minister Glenbert Croes a join e ministernan menciona dialuna merdia y e tambe a tuma su prome shot di vacuna.
Covid a dal Aruba hopi duro no solamente economicamente pero tambe a ocasiona un total di 79 morto. E efectonan di e virus aki ta hopi fuerte specialmente riba nos grandinan y riba esnan mas vulnerabel cu ta esnan cu ta sufri di un of otro malesa cronico. Pa por proteha nos grandinan y esnan vulnerabel ta consehabel pa comunidad completo registra pa tuma e vacuna aki evitando asina cu esnan cu ser contagia cu e virus di Covid-19 lo bira hopi malo, bay hospital of fayece a causa di complicacionnan.
Premier Wever – Croes ta keda haci yamada na comunidad di Aruba pa tur persona cu no a registra ainda pa porfabor registra na e app Aruba Health. Unico cos cu bo tin mester ta bo number di AZV y den algun minuut bo ta cla. Y si tin cualkier hende cu ainda ta den duda, ta conseha pa consulta cu dokter pa papia di tur e preocupacionnan cu tin.
“Ta hopi hende ta sufriendo na man di Corona Virus y aworaki ta momento pa cuminsa pensa riba recuperacion di nos Pais. Cu e vacuna nos por cuminsa pensa realmente riba reconstrui nos pais economicamente. Aruba ta conta cu bo”, Prome Minister a expresa.
Download e app Aruba Health; http://aruba.dvgapp.org