Home International Trio cu a haya problema cu nan boto, a landa yega un...

Trio cu a haya problema cu nan boto, a landa yega un isla bandona y 5 siman despues a wordo localisa

SHARE

Florida, USA –

Diamars ultimo tres persona a wordo rescata pa guarda costa Mericano, esaki despues di casi 5 siman cu nan a haya problema cu un boto y a landa yega na un isla bandona hopi chikito.

E trio aki a sobrevivi comiendo coco, calco, cocolishi, cangreu etc. y te hasta djaka nan lo a come pa asina keda na bida. Tabata trata di dos homber y un muhe, tur di nacionalidad Cubano.

E team di rescate a conta cu nunca antes nan no a mira algo asina ” e tabata algo increibel”. E isla caminda e trio a yega, ta un isla hopi chikito entre Florida Keys y Cuba.

Dialuna pa casualidad durante cu Coast Guard tabata patruyando e tripulante abordo di e avion a mira movecion riba e isla, esaki tabata na momento cu e tres personanan tabata zwaai cu banderanan cu nan mes a improvisa, e trio tabata zwaai cu e banderanan pa asina trata na hala atencion di esnan abordo di e avion.

Pa motibo di mal tempo e tripulante di e avion di Coast Guard no por a rescatanan di biaha y nan mester  a keda un anochi mas riba e isla. Mientras tanto Coast Guard a pasa drop cuminda, awa y un portofoon pa asina nan por a cuminsa comunica cu nan.

Segun e hefe di Guarda Nos Costa, ” lastimamente nos no tabata tin un persona den nos team cu por a papia spaño bon”, pero asina mes nan a trata na comunica cu e trio, cu e poco spaño cu e miembronan di Coast Guard abordo di avion tabata sa. Asina Coast Guard a bin haya sa cu nan ta Cubando y tabata tin mester di atencion medico. Tambe nan a splica cu nan tabata tin mas o menos 33 dia riba e isla.

E trio a conta e personal di Coast Guard cu algun siman pasa nan a landa bay na e isla, despues cu nan boto a bolter. E team di rescate a keda babuca cu nan por a sobrevivi asina hopi dia riba e isla aki. Segun un miembro di Coast Guard “na prome instante e isla tabata mustra cu no tin nada, pero toch tabata tin algun mata, mondi chikito unda nan por a sconde pa solo y awacero”

Diamars un helicopter porfin a logra saca e tres Cubanonan for di riba e isla chikito aki yama Anguilla Cay. Tur tres, despues a wordo transporta pa un hospital na Florida. Nan tabata mustra dehidrata y hopi cansa, pero mientras tanto nan ta sigui miho. Segun un representante di Coast Guard nan ta hopi contento y a splica kiko exactamente a sosode cu nan. “E ta algo increibel, con nan por a logra mantene nan mes na bida y den e condicion di salud cu nan a wordo haya, no tabata di e malo ey, nos a kere cu nan lo tabata hopi mas pio”.

Segun Coast Guard si e tres personanan aki no a wordo haya mas sigur nan lo a fayece pa falta di awa. E trio aki a wordo entrega den man Imigracion Americano.