ORANJESTAD – Corte di Husticia a trata e caso penal cu Ministerio Publico a cuminsa contra e homber A.L. acusa di viola ley di droga y posecion di arma di candela.
Aruba Native por a compronde cu Fiscal a acusa A.L. cu entre Augustus 2017 y Augustus 2020, tabata bende marihuana y cocaina. Tambe Fiscal a acusa A.L. di tabatin un pistool 9 mm.
Hues a mustra cu segun e procesverbaal di Polis, a haci investigacion na cas di mama di A.L. y a haya droga y arma di candela. Na Polis A.L. a declara cu e droga y arma ta di dje. El a bisa cu mas o menos 3 aña e tabata bende marihuana y 1 aña cocaina.
Den Corte, A.L. a bisa Hues cu esey no ta berdad. El a bisa cu 3 aña e tabata huma black sigarette y 1 aña mas o menos a bende droga.
Hues a remarca pakico Polis ta menciona 3 aña y no mas aña. Segun A.L. e no sa pero e sa sigur cu e tin mas o menos 1 aña ta bende. Hues a bisa cu tin algun persona cu a wordo interoga cu tabata cumpra droga for di A.L. E personanan ta papia di 6 luna y 1 aña y mey. E mama di A.L. a bisa cu mas o menos 1 aña su yiu tabata bende droga.
Hues a puntra A.L. pakico e tin un arma. Segun A.L. el a wordo amenaza dos biaha cu morto y si Recherche wak bon den su cellular e lo mira e amenazanan. El a bisa cu el a cumpra e arma pa proteha su mes y no ta pa mata hende. El a bisa cu e menazanan no tin nada di haci cu droga sino peleanan cu a bay for di man. Hues a bisa A.L. cu arma ta sumamente peligroso y cosnan por resulta fatal. A.L. a bisa cu e kier sali for di e mundo di droga y kier ayudo.
Fiscal a bisa Hues cu A.L. tabata gana mas o menos 2 mil florin pa siman cu bendemento di droga. Esey ta suma masha hopi placa pa aña. Fiscal ta haya cu ultimo añanan A.L. tabata un coneccion importante den e mundo di droga. Fiscal ta haya proba cu A.L. tabata bende pa 3 aña marihuana y 1 aña cocaina. Tambe e arma di candela. Fiscal a exigi 3 aña di prison, kitando e tempo cu A.L. ta den prison. E mas o menos 7 mil florin cu a haya na cas lo keda confisca.
Hues a sera tratamento di e caso y a dicta sentencia di biaha. Hues ta haya cu durante 1 aña, A.L. a bende. Esaki pasobra cu tur e personanan ta papia di 1 aña y Hues ta duna beneficio di duda riba e 3 aña. Pa cu e castigo, Hues a tene cuenta cu A.L. kier sali for di e mundo di droga. Hues a desvia di exigencia di Fiscal. Hues ta haya cu A.L. mester guia di Reclasering. Hues tambe a tene cuenta cu maneho di Corte y cu ta promer biaha A.L. ta cay sera pa droga y arma.
Hues a condena A.L. na 30 luna di prison di cual 6 luna ta condicional y 2 aña di prueba y bao guia di Reclasering. E placa confisca, 7 mil florin, na opinion di Hues, ta relaciona cu e bendemento di droga y lo keda confisca.