Home History of Aruba Historia di Aruba: Un dia manera awe, 1 di januari

Historia di Aruba: Un dia manera awe, 1 di januari

SHARE

1 di januari 1958: Hit and run fatal algun minuut despues di mey anochi
San Nicolas, aña nobo, pa mas o menos 00.05 am Dokter Düssenbroek a constata morto di Sr. Zacharias Giel (47), e prome morto di aña 1958.
Zacharias tbt para canto di caminda na momento cu e lo a wordo alcansa pa un Buick Cora y chauffeur no a para pa su responsabilidad y a sigui core. Zacharias a wordo benta un 20 meter mas leu y a fayece mesora na e sitio. Dr. Dussenbroek tabata cerca y mesora a constata morto. Un caso hopi tristo cu a sosode na altura di garashi di Wong.

1 di januari 1959: E prome candela di aña 1959 tabata Sastreria Moffat den Rembrandstraat, San Nicolas.
E Sastreria Moffat den algun minuut tabata bou vlamnan feros di candela. Danki na polis y brandweer cu a actua hopi lihe a preveni cu e casnan den e block aki no a kima. Brandweer no por a haci nada mas pa scapa e sastreria, pero a opta pa muha e casnan di palo den e block aki y asina por a logra cu e candela no por a expande. E sastreria a kima por completo y e doño a perde tur su pertenencianan cu tabata den e sastreria.

1 januari 1970: Baby aña a nace riba brug Mahuma

Mahuma: Sra R. Arrindell tabata bayendo cu urgencia hospital pa duna lus, pero e baby no por a warda pa yega hospital y a dicidi di nace na caminda pa hospital. E chauffeur mester a para e auto riba e brug na Mahuma y asina Sra. Arrindell a duna lus den auto riba e brug di Mahuma.

1 di januari 1970: Pastoor a logra kita arma for di un homber patras di Misa di Santa Cruz

Despues di sirbishi di misa di mey anochi, a surgi un pleitamento basta serio patras di misa di Santa Cruz. Dos mucha homber tabata pleitando y na dado momento un a saca revolver pa e otro. Mesora esnan cu a mira locual ta pasando a core bay yama pastoor.  Pastoor mesora a bay interveni pa cos no bay for di man. E la pidi e mucha homber  cu tabata tin e revolver pa dun’e e revolver.  E mucha homber despues di un rato a dicidi di entrega pastoor e revolver.  Pastoor na su turno a entrega esaki na polis. E revolver tabata carga cu 5 bala.

1 di januari 1974: Homber ta fayece despues di a wordo hinca pa un muhe.
Un homber di fam Mackay, kende tabata casa y tabata tin 3 yiu a fayece dia 1 di januari na San Pedro Hospitla. E la fayece di e heridanan cu e la ricibi durante un bringamente den cual e la wordo hinca pa un muher, e pelea a sosode dia 23 di december 1973, durante cu e tabata bringando un muher a puñal’e y maske na prome instante no tabata mustra hopi grave, toch asina mes e la fayece

1 di januari 1980: Juan David Irausquin tabata baby di aña 1980

E baby a nace 01.30 am, na Dr. Horacio Oduber Hospital, Su tata tabata e conocido comerciante Ruben Irausquin, E baby a haya e nomber Juan David Irausquin y a pisa 3700 gram. Prome baby di aña 1980, despues a bira un politico, ministro y parlamentario di Aruba.

1 di januari 1982: Piedra Plat, Accident fatal dilanti Bright Bakery
Den careda di 7’or y 15, un peaton a wordo alcansa pa un auto dilanti Bright Bakery y a keda seriamente herida. Tabata trata di ruman homber di Harry Bareño. E ruman homber C. Bareño (75) tabata cla pa crusa caya y no lo pone bon tino riba caminda, net na e momento ey tabata biniendo un auto y e chauffeur no por a haci nada mas.

E impacto tabata hopi fuerte, e victima a keda gravemente herida, cu urgencia e la wordo transporta pa hopital caminda un rato despues e la fayece.

1 di januari 1982: Marinero Mericano (32) di e barco ” Miss Abby Mae” a cay na lama y a fayece
Oranjestad, Den careda di 4’or y mey un marinero Mericano di 32 aña, Leroy Martin a perde su bida. Den oranan di anochi Leroy Martin hunto cu 3 otro marinero y dos homber local a sali bay trip, nan a bay San Nicolas, aki ta caminda cu nan cuminsa bebe alcohol sin control. Tur 6 tabata basta bou influencia y a cuminsa discuti y bringa, den e oranan di marduga varios biaha nan a discuti y bringa caba cu otro. Ora cu nan a yega bek waf na momento cu na mester a subi e barco Mericano, a bolbe start un problema net na unda antes e barconan di fruta tabata mara den waf. Leroy cu tabata basta bou influencia y a trompica dal su cabes na un balki y a bay cay den lama. Mesora un di e marineronan a cuminsa busca Leroy pero no por a haye y asina a bati alarma.

Polis, brandweer y e buseado Vrieswijk a presenta na e sitio y asina e la logra localisa e curpa sin bida di Leroy Martin. Dr. Frederiks a presenta na e sitio pa constata morto.

Na altura unda antes tabata Ritz den Weststraat, polis a bin topa cu un v car sosopechoso, nan a constata cu den e auto tabata tin mancha di sanger, pa e motibo aki, polis a confisca e curpa y e auto pa asina cuminsa cu un investigacion. Den cuadro di e investigacion polis a detene 3 marinero di e mesun barco mericano y dos homber local, esaki tabata pa interogacion.

For di investigacion a sali na cla cu no ta trata di un crimen, autoridad a laga e curpa den libertada y prome cu a laga e 5 hombernan aki den libertad, polis a dunanan un bon scual.