Home International Tercer obheto misterioso a aparece na California

Tercer obheto misterioso a aparece na California

SHARE

ATASCADERO – Despues di e descubrimento den desierto di Utah y ariba un sero den e stad Piatra Neamt na Rumania, awor tin un tercer lugar na unda un obheto misterioso similar a wordo haya: Atascadero. E biga di metal di tres banda a aparece ariba Pine Mountain, un sero pafo di California.
Algun hende cu tawata canando a mira e obheto aki diaranson pasa, segun The Atascadero News, y a mencione ariba social media. Esaki a zorg pa un aglomeracion ariba Pine Mountain: un monton di hende a subi e sero pa por saca portret cu e obheto misterioso aki.
Contrario na esun di Utah, e obheto di Atascadero no ta pega duro den tera. E obheto di mas o menos 90 kilo ta movibel y por bolter cualkier ora. E obheto aki parce un obheto di stainless steel traha na cas door di un hende cu a soldeer y schroef esaki na otro.
E 3 obhetonan ta laga hende bai back na 2001: E pelicula A Space Odyssey. Na comienso di e pelicula aki, hendenan primitivo ta wordo confronta cu un obheto pisa cu ta stimula nan evolocion. Tur cos ta mustra ariba e hecho cu e tres obhetonan cu a aparece na Utah, Rumania y awor California ta traha aki na mundo mes y cu nan solamente tin como obhetivo pa stimula e fantasia di e usiarionan di social media.