Home » Mi casa no ta haci ningun esfuerso pa nos bida sexual, y mi ta perdiendo tur interes

Mi casa no ta haci ningun esfuerso pa nos bida sexual, y mi ta perdiendo tur interes

by Admin
0 comment 165 views

Durante nos prome dos aña hunto, nos tawata sexualmente hopi activo. Pero no tin pasion mas y ami mester mas cu ‘de bes en cuando’.
Nos ta casa pa varios aña. Den e ultimo seis luna mi a sinti cu mi atraccion sexual a baha te na e punto cu, maske cu e ta un muher sumamente bunita, asta bo por bisa: impresionante (e lo por ta un modelo, esey ta wordo remarca asta door di hende straño riba caya), mi no ta sintimi atrai sexualmente na dje. Na comienso di nos relacion, e sex tawata OK y nos tawata sexualmente activo durante e prome dos aña. Mi a splike cu ni cuanto energia ami trece aden, mi ta sinti falta di pasion di su banda. Casi nunca e ta tuma iniciativa pa sex, y ora e e hacie, e ta cuminsa, bisando: “Nos ta suppose di haci sex awe nochi, toch?” locual pami ta un turn-off. Den nos ultimo conversacion, el a bisa cu e ta ‘timido’. Despues di varios conversacion, el a bisa cu awor e ta compronde kiko e mester haci y lo bai traha riba dje, pero despues el a bolbe pidi pa sex sin demostra deseo of gana, pues ami no a sintimi atrai mas pa haci sex cune y mi a bolbe bise no. Dos luna pasa, el a cuminsa evita sex completamente. E ta un muher hopi amoroso y cariñoso, pero mi pasenshi practicamente a caba, locual ta un situacion hopi fastioso den un matrimonio. Ami no sa kiko pa haci.
Contesta:
Si bo relacion sexual tawata bon na comienso, kizas algo por a pasa, cu a pone cu el a perde confiansa den su mes. Ora un persona ta sinti su mes husga e por sinti su mes intimida y cuminsa hala atras. Encurashamento positivo ta e miho manera pa yuda un persona cu ta insigur den su mes. Den bo situacion, esaki lo nifica: Aprecia y premia cada logro chikito. Mi por compronde bo frustracion, pero den un situacion asina, na unda ya caba e ta sinti su mes insigur y vulnerabel, cualkier critica lo empeora e situacion.
Mi ta sospecha cu e ta sintie confundi, y mi pregunta ta, si abo a demostre di manera suficientemente comprendibel, kiko bo kier. En bes di keha cu nunca e ta inicia sex, bo lo por opta pa menciona un escena di un pelicula, na unda un muher ta drenta un sala inesperadamente, bisti den lingerie, y ta invita e homber pa bin disfruta cune. Bo casa no por lesa bo mente y ami ta kere cu e no ta compronde con pa ta seductivo na e manera cu abo ta desea. Y door cu e no ta compronde e ta sintie timido pa bai inventa algo, cu kizas no lo cai den bon tera cerca bo. Miedo di rechaso ta locual ta pone mayoria hende evita situacionnan. Pues, kizas e lo mester di mas direccion, mediante preguntanan of frasenan manera: “Kiko bo ta pensa si nos haci esaki?” “Bo lo mind bisti asina, mi lo haya esey hopi sexy!” Zorg pa inclui romance den bo relacion, encurashe, bise con bunita y sexy e ta y cu dia pa dia bo ta mas enamora di dje. Si e ta responde, asta cu gestonan chikito, zorg pa bo demostra aprecio. Eventualmente, e lo haña confiansa bek den su mes.
Pero si ta trata di su propio sentimientonan, ta bon pa conversa na un manera trankil y abierto y explora kiko por ta pasando, kisas e no ta sinti su mes desea of e tin miedo pa bisabo kiko e lo kier. Esaki na e momento aki lo por ta incomfortabel pe, pues no bai insisti demasiado, djis bise cu cualkier cos cu e tin den mente, cualkier idea of fantasia, lo por wordo realisa, si e comparti nan cubo. Y atrobe, echt aprecia ora e comparti un deseo intimo cubo.
Corda cu caida di libido por tin otro origen tambe, uno mas complica, cu no lo por wordo soluciona cu un simpel cambio di habito. Den caso cu ningun esfuerso di bo banda ta yuda pa provoca cambio den dje, kisas ta bon pa sugeri terapia di pareha of personal, pa mira unda e problema ta origina. Remedinan anti-depresivo tambe por causa caida den libido, pues esaki tambe ta algo pa considera, como tambe menopausa.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio